ព័ត៌មានបច្ចេកវិទ្យា

អាចន៍ផ្កាយមួយពិតជានឹងមកបុកផែនដី: ក្រុមតារាវិទូព្រមាន

ក្រុមតារាវិទូ កំពុងចេញសេចក្តីព្រមានថា ភពផែនដីយើងពិតជានឹងត្រូវបុកប៉ះដោយអាចន៍ផ្កាយមួយ នៅពេលណាមួយជាក់ជាមិនខានឡើយ បើគ្មានវិធានការ​ទប់ស្កាត់ឱ្យបានទាន់ពេលវេលាជាមុនទេនោះ។

សមាជិកក្រុមម្នាក់ឈ្មោះ Alan Fitzsimmons មកពីសកលវិទ្យាល័យ Queen’s University Belfast នៃចក្រភពអង់គ្លេស បានអះអាងថា ផែនដីយើងកំពុងប្រឈមនឹងគ្រោះថ្នាក់នៃការមកដល់របស់អាចន៍ផ្កាយដែលនៅរសាត់អណ្តែតជុំវិញប្រព័ន្ធព្រះអាទិត្យ។

លោក Fitzsimmons បន្ថែមថា វាអាចនឹងស្រដៀងទៅនឹងការធ្លាក់របស់អាចន៍ផ្កាយមួយក្នុងឆ្នាំ ១៩០៨ នៅ Tunguska នៃតំបន់ Siberia ប្រទេសរុស្ស៊ី ដែលបានបំផ្លិចបំផ្លាញសំណង់អគារ និងព្រៃឈើមួយកន្លែង តែមិនបានបង្កឱ្យបាត់​បង់ជីវិតមនុស្សនោះទេ។ ប៉ុន្តែ ប្រសិនបើវាធ្លាក់ចំទីក្រុងធំៗវិញ សោកនាតកម្មនឹងកើតមានឡើង។

លោកនិយាយថា ជារៀងរាល់ថ្ងៃក្រុមតារាវិទូរកឃើញអាចន៍ផ្កាយកៀកៗនឹងផែនដី ហើយភាគច្រើនមិនមានការគំរាមកំហែងដល់មនុស្សលោកឡើយ។ ទោះយ៉ាងណា វាពិតជាអាចកើតឡើងម្តងទៀតដូចករណី Tunguska បើយើងមិនបានត្រៀមខ្លួនដើម្បីធ្វើអ្វីមួយចំពោះពួកវាទេនោះ៕

ប្រែសម្រួល: សេង

ប្រភពព័ត៌មាន bgr

មតិយោបល់