ក្រោយពីរងការរិះគន់ពីមជ្ឈដ្ឋានផ្សេងៗអំពីភាពបរាជ័យក្នុងការរាំងខ្ទប់មាតិកាឃោសនាផ្សព្វផ្សាយរបស់ក្រុមភេវរនិយមនៅលើបណ្តាញសង្គមរបស់ខ្លួនមក ក្រុមហ៊ុនបច្ចេកវិទ្យាគ្រាក់ៗនៅអាមេរិកដែលមាន Facebook, YouTube, Twitter, និង Microsoft បានប្រកាសរួមដៃគ្នារកដំណោះស្រាយតាមផ្លូវបច្ចេកវិទ្យាដើម្បី​លុបបំបាត់មាតិកាទាំងនោះ។

នៅក្នុងវេទិការួមគ្នាមួយដើម្បីប្រឆាំងនឹងក្រុមភេវរនិយម ក្រុមហ៊ុនមានមូលដ្ឋាននៅតំបន់ Silicon Valley រដ្ឋកាលីហ្វ័រនីយ៉ា សហរដ្ឋអាមេរិក បានប្រកាសថា ពួកគេនឹងរួមសហការគ្នាបាញ់ឆ្ពោះទៅរកដំណោះស្រាយ ការស្រាវជ្រាវ និងចាប់ដៃគូជាមួយរដ្ឋាភិបាល និងអង្គការសង្គមស៊ីវិលនានា ដើម្បីប្រឆាំងក្រុមភេវរនិយម។

នៅក្នុងវេទិកា Global Internet Forum to Counter Terroism នៅថ្ងៃចន្ទម្សិលមិញ ក្រុមហ៊ុនយក្សទាំងនោះ បាននិយាយថា ពួកគេនឹងស្វែងរកមធ្យោបាយតាមចាប់ និងចាត់ថ្នាក់មាតិកាឃោសនាផ្សព្វផ្សាយនានារបស់ក្រុមភេវរករ ដោយការប្រើប្រាស់កម្មវិធី Machine Learning និងកំណត់វិធីសាស្រ្តក្នុងការរាយការណ៍មាតិកានៅលើបណ្តាញសង្គមដែលប្រកបដោយស្តង់ដាតម្លាភាព ដើម្បីលុបចោលនូវមាតិការបស់ពួកភេវរករ។
ក្រុមហ៊ុនបានថ្លែងបន្ថែមថា ក្រោមភាពជាដៃគូជាមួយគណកម្មការប្រឆាំងភេវរនិយមរបស់អង្គការសហប្រជាជាតិ និងអង្គការពាក់ព័ន្ធមួយចំនួន ពួកគេនឹងអាចរកឃើញវិធីល្អបំផុតដើម្បីប្រឆាំងនឹងសកម្មភាពរបស់ក្រុមភេវរនិយម និងមាតិកាដែលចារិកញុះញុងបង្កើតឱ្យមានភាពស្អប់នៅលើប្រព័ន្ធអនឡាញ និងរក្សាឱ្យបាននូវសេរីភាពក្នុងការបញ្ចេញមតិ និងសិទ្ធិក្នុងការរក្សាឯកជនភាពរបស់អ្នកប្រើប្រាស់។

គួរបញ្ជាក់ថា​ ក្រុមហ៊ុនបច្ចេកវិទ្យាទាំងនេះ បានជួបបញ្ហាជាយូរមកហើយក្នុងការស្វែងរកតុល្យភាពរវាងបេសកកម្មរបស់ពួកគេក្នុងការគាំទ្រសេរីភាពបញ្ចេញមតិ ជាមួយតម្រូវការក្នុងការលុបចេញ និងការពារការរីករាលដាលនៃមាតិកាភេវរនិយម។ ក្នុងនោះដែរ ពួកគេក៏បានប្រឈមមុខនឹងបណ្តឹងផ្លូវច្បាប់ជុំវិញការចោទថា បានផ្តល់ទីកន្លែងដល់ពួកភេវរករឃោសនា និងអំពាវនាវឱ្យមានការចូលរួមក្នុងអំពើភេវរកម្ម និងផ្សព្វផ្សាយសារមនោគមដែលពោរពេញទៅដោយខ្លឹមសារស្អប់ និងហិង្សា៕

ប្រែសម្រួលៈ សេង, ប្រភព: theguardian