ទីបំផុតក្រុមហ៊ុន Nissan បានប្រកាសជាផ្លូវការណ៍ថ្ងៃបរិច្ឆេទប្រកាសចេញរថយន្តដើរដោយថាមពលអគ្គិសនីទាំងស្រុងជំនាន់ទីពីររបស់ខ្លួនហើយថា នឹងបង្ហាញរូបរាងឡើងនៅថ្ងៃទី ០៦ កញ្ញា ប៉ុន្តែ មិនបានប្រាប់ព័ត៌មានលម្អិតអំពីវាបន្ថែមនោះទេ។

រថយន្តត្រកូល Leaf ម៉ូឌែលបន្ទាប់នោះ ត្រូវគេរំពឹងថា នឹងរចនាតាមលំនាំរថយន្តគំរូទ្វារប្រាំដ៏ទាក់ទាញរបស់ក្រុមហ៊ុន ដែលបំពាក់បច្ចេកវិទ្យាបើកបរស្វ័យ​ប្រវត្តិ និងបានបង្ហាញឡើងក្នុងឆ្នាំ ២០១៥។ ហើយវានឹងចេញលក់នៅលើទីផ្សារ​ក្នុងឆ្នាំ ២០១៨ ជាមួយការបង្កើនថាមពលអាគុយទ្វេដង ធៀបទៅនឹង​ម៉ូឌែល​បច្ចុប្បន្ន។

ការត្រៀមផលិតចេញរថយន្ត Leaf EV ម៉ូឌែលថ្មីនេះដែរ គឺធ្វើឡើងដើម្បីប្រកួតប្រជែងជាមួយរថយន្ត Bolt EV របស់ Chevrolet និង Ioniq របស់ Hyundai ទាំងប្រព័ន្ធបច្ចេកវិទ្យាអេឡិចត្រូនិចបំពាក់ក្នុងរថយន្ត និងរយ:ចម្ងាយផ្លូវអតិបរមាដែលវាអាចបើកបរបានក្រោយសាកថាមពលបំពេញម្តង។ មួយវិញទៀត ក្រុមហ៊ុនផលិតរថយន្តរបស់ប្រទេសជប៉ុន ក៏ចង់ប្រកួតប្រជែងជាមួយរថយន្ត Tesla Model 3 ដែលមិនទាន់ចាប់ផ្តើមចង្វាក់ផលិតកម្មនៅឡើយ របស់ក្រុមហ៊ុនអាមេរិកផងដែរ។

នាយកប្រតិបត្តិក្រុមហ៊ុន Nissan លោក Carlos Ghosn បាននិយាយថា ក្រុមហ៊ុនកំពុងធ្វើការអភិវឌ្ឍម៉ាស៊ីនដើរដោយថាមពលអគ្គិសនីផ្សេងៗសម្រាប់គ្រោងការផលិតកម្មរបស់ខ្លួននាពេលអនាគត ហើយចង្វាក់ផលិតកម្មរថយន្ត Leaf EV ដំបូងបង្អស់ គឺជាចំណុចចាប់ផ្តើមដ៏សំខាន់នៃវត្តមានរបស់ខ្លួននៅក្នុងទីផ្សាររថយន្តអគ្គិសនីរបស់ពិភពលោក៕

ប្រភពព័ត៌មាន: cnet