ក្រុមហ៊ុន Microsoft បានប្រកាសកាត់បន្ថយបុគ្គលិកប្រមាណ ៣០០០ នាក់ នៅទូទាំងពិភពលោក ដែលភាគច្រើនឋិតនៅក្នុងដេប៉ាឌឺម៉ង់ផ្នែកលក់ ខណៈកំពុ​ងព្យាយាម​​ដាក់ទម្ងន់ខ្លួនទៅលើអាជីវកម្ម Cloud Computing ដែលកំពុងរីកចម្រើនខ្លាំង។

ចំពោះដំណើរការកាត់បន្ថយបុគ្គលិកដែលមានចំនួនស្មើនឹងជិត ១០ ភាគរយ នៃកម្លាំងការងារផ្នែកលក់សរុបរបស់ក្រុមហ៊ុននេះ ដែលនឹងធ្វើឡើងនៅក្រៅទឹកដីសហរដ្ឋអាមេរិកប្រមាណ ៧៥ ភាគរយ គឺដើម្បីជាកិច្ចប្រឹងប្រែងជួយជំរុញអាជីវកម្ម Cloud របស់ក្រុមហ៊ុន មានឈ្មោះថា Azure ឱ្យមានសន្ទុះខ្លាំងទៅមុខ។

នៅក្នុងសេចក្តីថ្លែងការមួយ ក្រុមហ៊ុននិយាយថា ខ្លួនកំពុងធ្វើការផ្លាស់ប្តូរដ៏សំខាន់មួយដើម្បីជំរុញឱ្យការផ្តល់សេវាកម្មដល់អតិថិជន និងដៃគូកាន់តែប្រសើរ ដោយផ្តោតទៅលើសេវាកម្ម Cloud ដែលជាប្រភពថាមពលសម្រាប់ក្រុមហ៊ុន Microsoft និងដែលទទួលបាននូវប្រាក់ចំណូល ១.៧ ពាន់លានដុល្លារ ក្នុងរយៈពេល ៩ ខែ គិតត្រឹមបំណាច់ខែមិនា ដោយសារតែកំណើនប្រាក់ចំណូលទ្វេដងពីកម្មវិធី Cloud Computing ឈ្មោះ Azure របស់ខ្លួន។

ទោះយ៉ាងណា Microsoft នៅតែឋិតនៅដាច់ឆ្ងាយពីក្រោយ Web Services របស់ក្រុមហ៊ុន Amazon ក្នុងឧស្សាហកម្ម Cloud នេះនៅឡើយ៕

ប្រភពព័ត៌មានៈ bbc