ស្រ្តីម្នាក់ត្រូវបានចាប់ឃាត់ខ្លួនភ្លាមៗដោយមន្រ្តីគយនៅក្នុងប្រទេសចិន នៅប៉ុន្មានថ្ងៃមុននេះ ខណៈកំពុងព្យាយាមនាំយកទូរសព្ទ iPhone រហូតដល់ទៅ ១០២ គ្រឿង ឆ្លងដែនចូលទៅក្នុងប្រទេស តាមរយៈការលាក់នៅក្នុងរាងកាយ។ នេះបើ​យោងតាមរបាយការណ៍ព័ត៌មានចេញផ្សាយនៅលើគេហទំព័រ 9to5Mac។

ឈ្មួញរត់ពន្ធ iPhone រូបនេះ ដែលត្រូវបានគេផ្តល់រហ័សនាមយថា “Iron Man” ឬប្រែថា​ “មនុស្សដែក” ត្រូវ​មន្រ្តីគយប្រចាំការនៅឯព្រលានយន្តហោះទីក្រុង Shenzhen កត់សង្ស័យទៅលើការស្លៀកពាក់របស់នាងដែលមើលទៅហាក់ដូចជាប៉ោងខុសធម្មតា ហើយបន្ទាប់ពីចាប់ឃាត់ខ្លួនដើម្បីឆែកមើល ក៏រកឃើញ iPhone ចំនួនរហូតដល់ ១០២ គ្រឿង លើដងខ្លួន និងចង្កេះ រំដោយថង់ផ្លាស្ទិក មានទម្ងន់សរុបជាង ២២ គីឡូក្រាម។

លើសពីនេះទៅទៀត ក្រៅពី iPhone មន្រ្តីគយក៏បានឆែករកឃើញស្រ្តីរូបនោះ មានលាក់នាឡិកាដៃប្រណិតៗ ១៥ គ្រឿងផ្សេងទៀតក្នុងខ្លួនផងដែរ ហើយបើគិតជាទឹកប្រាក់សរុប គឺមានប្រមាណជិត ១០ មឺុនដុល្លារអាមេរិក​។

បើទោះបីជា ទូរសព្ទដៃ iPhone របស់ក្រុមហ៊ុន Apple បាននិងកំពុងមានវត្តមាននៅលើទីផ្សារប្រទេសចិន ជាច្រើនឆ្នាំមកហើយក្តី ក៏ការរត់ពន្ធលើផលិតផលដ៏ពេញនិយមមួយប្រភេទនេះ នៅតែបន្តកើតមានជាហូរហែ ដោយសារតែវាជាជំនួញមួយចានទឹក មួយចានគោក។

មូលហេតុគឺ ដោយសារតែ iPhone នាំចូលស្របច្បាប់ទៅកាន់ប្រទេសដែលមានប្រជាជនច្រើនជាងគេបំផុតលើលោកនេះ មានតម្លៃខ្ពស់ជាងតម្លៃធម្មតាដល់ទៅ ៣០% ដោយសារជាប់កាតព្វកិច្ចពន្ធនាំចូល និងពន្ធបន្ទាប់បន្សំផ្សេងៗ ដែលកំណត់ដោយរដ្ឋាភិបាល។

គួរបញ្ជាក់ថា កន្លងមក ក៏មានដែរការលួចលាក់ដាក់នាំយកទូរសព្ទ iPhone តាមខ្លួនដើម្បីគេចពន្ធចូលទៅកាន់ប្រទេសចិន ប៉ុន្តែ មិនមានចំនួនច្រើនលើសលុបបែបនេះនោះទេ គឺច្រើនបំផុតមានត្រឹមតែ ៨០ គ្រឿងប៉ុណ្ណោះ៕

ប្រភពព័ត៌មានៈ theverge