បុរសម្នាក់ឈ្មោះ Yulianto អាយុ ៤៧ ឆ្នាំ ដែលជាអ្នកមើលការខុសត្រូវសណ្ឋាគារ បានជួបឧប្បត្តិហេតុដ៏អាក្រក់មួយ ដោយទូរសព្ទ Samsung ដែលឋិតក្នុងហោប៉ាវអាវរបស់លោក ស្រាប់តែផ្ទុះឆេះឆាបចេញជាអណ្តាតភ្លើងឡើង ខណ:លោកកំពុងឈររង់ចាំនៅកន្លែងទទួលភ្ញៀវក្នុងសណ្ឋាគារ Ciputra នាទីក្រុង Semerang ប្រទេសឥណ្ឌូណេស៊ី នៅថ្ងៃសៅរ៍កន្លងទៅ។
យោងតាមវីដេអូកាមេរ៉ាសុវត្ថិភាពសណ្ឋាគារ នៅពេលដែលលោក Yulianto លូកដៃចូលក្នុងហោប៉ាវរបស់ខ្លួន ស្រាប់តែទូរសព្ទ Samsung របស់លោកផ្ទុះ ហើយបែកជាផ្កាភ្លើងឆាបឆេះឡើង។ ភ្លាមៗនោះ លោកក៏បម្រុងយកទូរសព្ទនោះចេញពីហោប៉ាវ ប៉ុន្តែមិនអាចធ្វើទៅបាន រួចលោកក៏ផ្តួលខ្លួនទៅលើកម្រាលឥដ្ឋ បន្ទាប់មក ក៏មានបុរសម្នាក់នៅក្បែរនោះ មកជួយដោះអាវលោកចេញយ៉ាងទាន់ហន់បំផុត។
លោកបាននិយាយថា មុនពេលផ្ទុះឆេះនោះ លោកមានអារម្មណ៍ថា ទូរសព្ទក្នុងហោប៉ាវខ្លួនហាក់មានកម្តៅខ្លាំង និងចាប់ផ្តើមញ័រឡើង។ ហើយក្រោយពេលវាផ្ទុះឆេះភ្លាម លោកក៏ប្រញាប់ដោះអាវរបស់ខ្លួនចេញឱ្យបានលឿនតាមដែលអាចធ្វើទៅបាន។
លោកបន្ថែមថា លោកបានបើក WiFi, Bluetooth និង GPS លើទូរសព្ទដំណាលគ្នា ដែលប្រហែលជាមូលហេតុនាំឱ្យវាឡើងកម្តៅខ្លាំង រហូតដល់ផ្ទុះឆេះដូច្នេះ។
តាមការឱ្យដឹងពីប៉ូលិសប្រចាំតំបន់ ហេតុការនេះកើតឡើងនៅថ្ងៃទី ៣០ កញ្ញា ហើយទូរសព្ទមួយគ្រឿងនោះ គឺម៉ាក Samsung ម៉ូឌែល Grand Duos និងជារបស់លោក Yulianto អាយុ ៤៧ ឆ្នាំ។
//www.youtube.com/watch?v=2WXhBoeAYi4
ពាក់ព័ន្ធនឹងឧប្បត្តិហេតុនេះ លោក Jo Semidang នាយកទីផ្សារក្រុមហ៊ុន Samsung Electronics ប្រចាំប្រទេសឥណ្ឌូណេស៊ី បាននិយាយប្រាប់សារព័ត៌មានក្នុងតំបន់ថា ពួកគេកំពុងធ្វើការស៊ើបអង្កេតទៅលើរឿងនេះ។
លោកបន្ថែមថា៖ «សវត្ថិភាពអតិថិជនគឺជាកត្តាអថិភាពខ្ពស់បំផុតរបស់យើង ហើយយើងបានទាក់ទងទៅអតិថិជនរូបនោះហើយ ដើម្បីផ្តល់ការជួយឧបត្ថម្ភចាំបាច់ផ្សេងៗ ហើយយើងថ្មីៗនេះកំពុងធ្វើកោសល្យវិច្ឆ័យលើឧបករណ៍នោះ៕
ប្រភពព័ត៌មាន: dailymail
មតិយោបល់