នៅរសៀលថ្ងៃទី៦ តុលា នេះ តារាចម្រៀង៤ដួង រួមមានអ្នកនាង ពេជ្រ សោភា កញ្ញាសុខ ពិសី នាយចឺម និងតារាចម្រៀងលោក Step នឹងច្រៀងប៉ះគ្នានៅក្នុងប្រទេសកូរ៉េខាងត្បូង ដើម្បីប្រជែងប្រជាប្រិយភាពគ្នានៅក្នុងចំណោមពលករខ្មែររាប់ពាន់នាក់ ដែលជាអ្នករៀបចំកម្មវិធី។

នេះជាការប្រគំតន្ត្រីដែលបងប្អូនជាពលករខ្មែរបានរួមគ្នារៀបចំដើម្បីប្រមូលមូលនិធិដែលបានពីការប្រគំតន្ត្រី ជួយដល់មន្ទីរពេទ្យគន្ធបុប្ផា និងកុមារកំព្រានៅកម្ពុជា។

តារាទាំំង៤បានចាកចេញពីប្រទេសកម្ពុជា កាលពីយប់ថ្ងៃទី៤ តុលា ដោយការចេញច្រៀងលើកនេះ គឺតារាម្នាក់ៗត្រូវបានប្រកាសថាមិនទទួលបានតម្លៃខ្លួននោះទេ ដោយសារតែការចេញច្រៀងគឺជាគម្រោងស្នើសុំរបស់ពលករខ្មែរនៅក្នុងប្រទេសកូរ៉េ ដើម្បីទៅច្រៀងរ៉ៃអង្គាសថវិកាជួយដល់មន្ទីរពេទ្យគន្ធបុប្ផា។ នេះជាការប៉ះគ្នានៅលើទឹកដីកូរ៉េខាងត្បូងរបស់តារាទាំង៤ជាលើកដំបូង ប៉ុន្តែសម្រាប់អ្នកនាងពេជ្រ សោភា គឺអ្នកនាងធ្លាប់បានអង្រួនឆាកតន្ត្រីនៅក្នុងព្រឹត្តិការណ៍នោះកាលពីមុនម្ដងហើយ ដោយបណ្ដាពលករខ្មែរនៅក្នុងប្រទេសនេះបានផ្ដល់រហស្សនាមអ្នកនាងថាជាកំពូលតារាចម្រៀងផ្នែកសប្បុរសធម៌ ដែលមិនឆ្មើងឆ្មៃនោះផង។

ដោយឡែកសម្រាប់តារាចម្រៀង៣ទៀត រួមមានកញ្ញា សុខ ពិសី នាយចឺម និងលោក Step គឺជាលើកទី១ដែលអ្នកទាំង៣បានឡើងលើវេទិកានោះ។ អ៊ីចឹងហើយទើបវត្តមានតារាទាំង២គូ គេកំពុងផ្ដោតការចាប់អារម្មណ៍ថាតើគូចម្រៀងមួយមានការចាប់អារម្មណ៍ជាងគេនៅក្នុងប្រទេសកូរ៉េរសៀលនេះ។
អ្នកគាំទ្រនិយាយថាវេទិកាប្រគំតន្ត្រីលើកនេះ តារាចម្រៀងពេជ្រ សោភា និងលោក Step គឺជាគូចម្រៀងមួយគូ ហើយកញ្ញា សុខ ពិសី និងនាយចឺម គឺជាចម្រៀងមួយគូ ដោយតារាចម្រៀងទាំង២គូសុទ្ធតែបានត្រៀមខ្លួនប្រទាញយកការគាំទ្ររៀងខ្លួននៅក្នុងកម្មវិធីនេះ។

ពេជ្រ សោភា ក្រៅពីបានប្រកាសឡើងច្រៀងជាមួយដៃគូ នាងក៏នឹងត្រៀមយកបទថ្មីសន្លាងគឺបទ «What’s Your name » ទៅបង្អួតនៅទីនោះ ទើបនាងបង្ហោះបទនេះភ្លាមៗមុនពេលចេញចាកចេញទៅកាន់ប្រទេសកូរ៉េ។ សម្រាប់នាយចឺម និងសុខ ពិសី ដែលមានបទរួមគ្នាគឺបទ «លលកស្រីយំ» ក៏ប្រកាសបង្អួតបទផ្ទុះៗរបស់ខ្លួនៗដើម្បីស្រូបកម្លាំងគាំទ្រផងដែរ។ ជនជាតិខ្មែរបម្រើការនៅក្នុងប្រទេសកូរ៉េ សុទ្ធតែចាំមើលពីសន្ទុះគាំទ្ររបស់អ្នកទាំង៤ ក្នុងពេលដែលការប៉ះគ្នារបស់តារាទាំង៤គឺពិតជាទទួលបានផ្លែផ្កាជាច្រើននៅក្នុងប្រទេសកូរ៉េខាងត្បូង ទាំងតម្លៃសង្គម និង តម្លៃប្រជាប្រិយភាព។ អ្នកទាំង៤ នឹងវិលត្រឡប់មកកម្ពុជាវិញ នៅថ្ងៃ៧ តុលា នេះ ដោយសារតែមានការងារមិនអាចបន្តនៅដើរលេងបាន៕

//youtu.be/sNfcteKWznk