យោងតាមអ្នកវិភាគផ្នែកប្រព័ន្ធសន្តិសុខឧបករណ៍បច្ចេកវិទ្យាដ៏មានឈ្មោះបោះសំឡេងម្នាក់មកពីក្រុមហ៊ុន KGI Securities គឺលោក Ming-Chi Kuo បានប្រមើមើលថា iPad Pro ស៊េរីឆ្នាំ ២០១៨ របស់ក្រុមហ៊ុន Apple អាចនឹងពាំនាំមកជាមួយមុខងារ Face ID ដ៏ឡូយ និងទាក់ទាញបំផុតមួយរបស់ iPhone X។

លោក Kuo បន្ថែមថា iPad Pro ស៊េរីបន្ទាប់នោះ នឹងប្រើបច្ចេកវិទ្យាតាមពីក្រោយ iPhone X ដែលត្រូវបានដកចោលបន្ទះស្គេនក្រយៅដៃ Touch ID ហើយជំនួសមកវិញនូវប្រព័ន្ធបច្ចេកវិទ្យា Face ID ដែលប្រើផ្ទៃមុខធ្វើជាកូនសោសុវត្ថិភាពចាក់ចូលទៅកាន់កម្មវិធីខាងក្នុងម៉ាស៊ីនឧបករណ៍។

គួររំឭកថា iPad Pro ស៊េរីចុងក្រោយ ដែលបានប្រកាសចេញកាលពីដើមឆ្នាំ មានការផ្លាស់ប្តូររចនាបទតែបន្តិចបន្តួចប៉ុណ្ណោះ ជាពិសេស​​​ ម៉ូឌែលអេក្រង់ ១០.៥ អីុញ ដែលមានកម្រាស់ និងគែមអេក្រង់ឆ្វេងស្តាំស្តើងជាងមុនបន្តិច ប៉ុន្តែ គែមលើក្រោមនៅតែក្រាស់ដដែល ដើម្បីទុកកន្លែងសម្រាប់ដាក់បន្ទះ Touch ID។

សម្រាប់ iPad Pro ជំនាន់ក្រោយវិញ ប្រសិនបើ Apple ប្តូរ Touch ID ចេញ ហើយដាក់ Face ID ចូលពិតមែននោះ គេមិនច្បាស់ថា ក្រុមហ៊ុននឹងកែប្រែរចនាបទរបស់វាម្តងទៀត ដើម្បីឱ្យអាចបំពាក់អេក្រង់ស្ទើរគ្មានស៊ុមដូច iPhone X ដែរឬក៏យ៉ាងណានោះទេ។

ប៉ុន្តែ វាពិតជាអាចទៅរួចសម្រាប់ឧបករណ៍ iPad ដែលមានអេក្រង់ជាង ១០ អីុញ ក្នុងការបំពាក់ប្រព័ន្ធកាមេរ៉ា TrueDepth សម្រាប់ស្គេនកំណត់អត្តសញ្ញាណផ្ទៃមុខមនុស្ស និងផ្ទៃអេក្រង់មុខលាតសន្ធឹងស្ទើរគ្មានគែមជុំវិញនោះ​៕

ប្រភពព័ត៌មានៈ businessinsider