យោងតាមម្ចាស់ទូរសព្ទ Galaxy S8 មួយចំនួនបានអះអាងនៅលើទំព័រ Samsung Community Forum ថា កាមេរ៉ាទូរសព្ទខាងក្រោយរបស់ពួកគេមាន​​បញ្ហាមិនថត Focus (ថតផ្ចង់) ដោយអូតូ នៅពេលពួកគេព្យាយាម​ថតតាមកម្មវិធីដើម និងកម្មវិធីបញ្ចូល។

ជាងនេះទៀត ទោះបីជាពួកគេចុចថត Focus ដោយខ្លួនឯង ក៏វាមិនដំណើរការដែរ។ នេះបើយោងតាមប្រភពព័ត៌មានពី SamMobileចេញផ្សាយនៅថ្ងៃម្សិលមិញ។

ទាក់ទងនឹងបញ្ហានេះ ក្រុមហ៊ុន Samsung មិនបានបញ្ជាក់ថា វាមកពីបញ្ហា Hardware ឬ Software នោះទេ។ ផ្ទុយទៅវិញ ក្រុមហ៊ុនបានប្រាប់ពីដំណោះស្រាយមួយចំនួនសម្រាប់ពួកគេគួរធ្វើការសាកល្បង។

យោងតាមក្រុមហ៊ុន Samsung ដំណោះស្រាយជំហានដំបូងគឺ អ្នកប្រើប្រាស់ត្រូវប្រាកដថា ប្រព័ន្ធប្រតិបត្តិការ និងកម្មវិធីថតនានា ត្រូវបានកែឡើងដល់ជំនាន់ចុងក្រោយបង្អស់។ ក្រុមហ៊ុនក៏ស្នើរឱ្យអ្នកដែលជួបបញ្ហាខាងលើ ធ្វើការសម្អាតទិន្នន័យរបស់កម្មវិធីចោល។

ក្រុមហ៊ុនបានបន្ថែមថា ដើម្បីឱ្យប្រាកដថា វាមិនមែនមកពីបញ្ហា Hardware កាមេរ៉ា អ្នកប្រើប្រាស់គួរសាកយកម្រាមដៃគោះសម្បកខាងក្រោមក្បែរកាមេរ៉ាក្រោយរបស់ទូរសព្ទ ក្រែងលមកពីគ្រឿងគ្រៅខាងក្នុងរត់ខុសកន្លែង ឱ្យវារត់ត្រូវកន្លែងវិញ។

ប្រសិនបើមិនទទួលបានប្រសិទ្ធភាពទៀត Samsung ផ្តល់យោបល់ថា អ្នកប្រើប្រាស់គួរតែធ្វើ Factory Reset (សម្អាតទិន្នន័យក្នុងទូរសព្ទឱ្យថ្មីដូចទើបបើកចេញពីប្រអប់) ហើយប្រសិននៅតែមិនបានការទៀត សូមយកទៅឱ្យជាងឆែកមើលឱ្យ ខណៈក្រុមហ៊ុនផ្តល់ជូននៅការធានារយៈពេលមួយឆ្នាំ។

គួរបញ្ជាក់ថា បញ្ហាកាមេរ៉ានេះកើតឡើង ខណៈនៅតែប៉ុន្មានខែទៀតប៉ុណ្ណោះ Galaxy S9 ដែលជាជំនាន់បន្ទាប់របស់វា ត្រូវគេរំពឹងថា នឹងបង្ហាញវត្តមានហើយ។ ពោលគឺ នៅក្នុងខែមករា ឆ្នាំក្រោយនេះ បន្ទាប់មក វានឹងចែកចាយលក់លើទីផ្សារភ្លាមៗក្រោយពីថ្ងៃប្រកាសចេញបានមួយរយៈពេលខ្លី៕

ប្រភពព័ត៌មានៈ tomsguide