យោងតាមប្រភពស្និទ្ធនឹងរោងចក្រផលិតកម្មរបស់ក្រុមហ៊ុន Apple បង្ហើបប្រាប់កាសែត DigiTimes បានឱ្យដឹងថា​ ក្រុមហ៊ុនយក្សអាមេរិកមួយនេះ កំពុងពិចារ​ណាលក់លើការផលិតចេញ iPad បំពាក់អេក្រង់ទំហំ ៩.៧ អីុញ តម្លៃទាបបំផុតមិនធ្លាប់មាន ត្រឹម ២៥៩ ដុល្លារ នៅត្រីមាសទី២ ឆ្នាំ ២០១៨។

ផលិតផល iPad គឺពិតជាអស្ចារ្យហើយ សម្រាប់គ្រប់គ្នាដែលចង់បានឧបករណ៍​ថេប្លេត​មកកាន់ប្រើក្នុងដៃ ប៉ុន្តែ តម្លៃរបស់វាគឺជាឧបសគ្គចំពោះពួកគេមួយចំនួន បើទោះបីជាម៉ូឌែលថោកបំផុតមានលក់លើទីផ្សារបច្ចុប្បន្នក៏មានតម្លៃ ៣២៩ ដុល្លារដែរ។

ចំពោះគ្រោងការទម្លាក់តម្លៃ iPad ស៊េរីឆ្នាំ ២០១៨ នេះ ប្រភពដដែលមិនបានដឹង​ច្បាស់ថា Apple នឹងកាត់បន្ថយថ្លៃដើមក្នុងការរចនា និងផលិត Hardware របស់វាយ៉ាងណានោះទេ ប៉ុន្តែ បានអះអាងថា ក្រុមហ៊ុននឹងផ្ទេរភារកិច្ចផលិតទៅ​ឱ្យរោងចក្រតៃវ៉ាន់ Compal Electronics ដែលមានក្រុមហ៊ុន Acer, Lenovo, Dell, Toshiba, និង Hewlett-Packard ឋិតក្នុងចំណោមអតិថិជនរបស់គេ។

គួរបញ្ជាក់ថា ការបន្ថយតម្លៃផលិតផល iPad នេះ គឺមិនមែនជារឿងគួរឱ្យភ្ញាក់ផ្អើលណាស់ណានោះទេ ខណ:ការលក់ផលិតផលកុំព្យូទ័របន្ទះស្តើងរបស់ Apple កំពុង​​ជួបការធ្លាក់ចុះយ៉ាងសម្បើមក្នុងរយ:កាលពីរបីឆ្នាំចុងក្រោយនេះ។

មួយវិញទៀត នេះអាចជាយុទ្ធសាស្រ្តមួយរបស់ក្រុមហ៊ុនអាមេរិក ក្នុងការប្រកួតប្រជែងទីផ្សារជាមួយផលិតផលថេប្លេតតម្លៃថោកៗតែមានសមត្ថភាពខ្ពស់របស់ក្រុមហ៊ុនគូប្រជែងដូចជា Amazon, Asus, និង Huawei។

ប្រសិនបើព័ត៌មានចចាមអារ៉ាមនេះ ក្លាយជាការពិតមែននោះ ទីផ្សារថេប្លេត​ប្រហែល​ជាមិនទាន់ដល់ទីបញ្ចប់នៅឡើយទេ៕

Apple គ្រោងចេញ iPad ស្រដៀង iPhone X ក្នុងឆ្នាំ ២០១៨

ប្រភពព័ត៌មាន: mashable