យោងតាមរបាយការណ៍ចេញផ្សាយដោយ SamMobile បានឱ្យដឹងថា ក្រុមហ៊ុន Samsung នឹងបង្កើនសមត្ថភាព ព្រមទាំងមុខងារប្រើប្រាស់របស់បន្ទះ DeX Pad សម្រាប់ Galaxy S9 ដើម្បីអាចឱ្យវាប្រែក្លាយទៅជាម៉ាស៊ីនកុំព្យូទ័រមួយដ៏ទំនើបមួយ បន្ថែមពីលើមុខងារស្មាតហ្វូនលំដាប់ថ្នាក់កំពូល។

នៅឆ្នាំ ២០១៧ បន្ទះ DeX Pad ជំនាន់ដំបូង ត្រូវបានប្រកាសចេញជាមួយ Galaxy S8 ដោយវាមិនត្រឹមតែដើរតួជាឆ្នាំងសាកថ្មឥតខ្សែប៉ុណ្ណោះទេ ប៉ុន្តែ ក៏ជាដុំសម្រាប់តភ្ជាប់ S8 ទៅ Monitor, Mouse និង Keyboard ដើម្បីប្រើជាលក្ខណ:​កុំព្យូទ័រលើតុដើរដោយប្រព័ន្ធ Android។

DeX Pad ជំនាន់ថ្មី បើតាមប្រភពពីគេហទំព័រស្និទ្ធនឹងក្រុមហ៊ុន Samsung ដដែលបានឱ្យដឹងថា​ វានឹងមានការរចនាសារជាថ្មី និងរក្សាមុខងារចាស់ឱ្យនៅដដែល។ ប៉ុន្តែ តាមរយ:ប្រព័ន្ធ Android Oreo បំពាក់មកជាមួយ S9 វានឹងអនុញ្ញាតឱ្យអ្នកប្រើប្រាស់យកអេក្រង់របស់ S9 ដើរតួជំនួស Keyboard និង Mouse បាន។

ដោយឡែក បើយោងតាម Galaxy Club ក្រុមហ៊ុន Samsung កំពុងធ្វើការនៅលើបន្ទះ DeX Pad ជំនាន់ថ្មី និងមិនបានផ្តល់ព័ត៌មានច្រើនអំពី ថាតើវាមានដំណើរការប្រើប្រាស់យ៉ាងដូចម្តេចនោះទេ។ ចំណែកតម្លៃក៏មិនទាន់ដឹងនោះដែរ។

គួររំឭកថា យោងតាមរបាយការណ៍មួយចំនួនបានឱ្យដឹងថា Galaxy S9 នឹងបង្ហាញវត្តមានជាមួយរចនាបទស្រដៀងទៅនឹងជំនាន់មុនរបស់វា ហើយនឹងបំពាក់បន្ទះឈីប Snapdragon 845 កាមេរ៉ាភ្លោះ ដើរលើប្រព័ន្ធ Android 8.0 Oreo ហើយវាអាចនឹងប្រកាសចេញនៅមុនពិព័រណ៌ CES ក្នុងខែមករា។ បន្ទាប់មក ក្រុមហ៊ុននឹងចាប់ផ្តើមចែកចាយលក់លើទីផ្សារក្នុងខែកុម្ភ: ឬយ៉ាងយូរបំផុតក្នុងមិនា៕

ប្រភពព័ត៌មាន: tomsguide