ឥណ្ឌា៖ ក្រុមហ៊ុនបច្ចេកវិទ្យាធំៗ​ចំនួន៣ ក្នុងនោះមាន Toshiba ,Sharp និង Foxconn បាននិងកំពុងតែ​ចាប់​ផ្ដើមវាយលុយ​ទីផ្សារ​ប្រទេសឥណ្ឌាជាថ្មី បន្ទាប់ពីបោះបង់ទីផ្សារយក្សមួយនេះអស់រយ:ពេលជាច្រើន។

ក្រុមហ៊ុនបច្ចេកវិទ្យាជប៉ុន Toshiba និង Sharp បានមើលឃើញ​ទីផ្សារប្រទេសឥណ្ឌា ដោយអាច​ចាប់ផ្ដើម​​​វាយលុយទៅលើផលិតផលផ្សេងៗដូចជា ស្មាតហ្វូន, ទូរទស្សន៍, ម៉ាស៊ីនបន្សុតខ្យល់, ម៉ាស៊ីនត្រជាក់ និង​ឧបករណ៍ប្រើប្រាស់នៅក្នុងផ្ទះ។

ចំណែកក្រុមហ៊ុន Foxconn របស់តៃវ៉ាន់វិញ បានសហការជាមួយនឹងរដ្ឋាភិបាលឥណ្ឌា ដោយបាន​សាងសង់​រោងចក្រ​ដ៏ធំមួយនៅលើទឹកដីឥណ្ឌា សម្រាប់ផ្គត់ផ្គង់នូវផលិតផលរបស់ក្រុមហ៊ុន Apple មានដូចជា iPhone, iPad និងម៉ាស៊ីន Mac ជាដើម។

យោងតាមការបញ្ជាក់ពីបុគ្គលិកជាន់ខ្ពស់របស់ Toshiba និង Sharp បានឲ្យដឹងថា នៅខែក្រោយនេះ ក្រុមហ៊ុន​នឹងចាប់ផ្ដើម​លក់នូវ​ផលិតផល​របស់ខ្លួនឡើងវិញនៅក្នុងប្រទេសឥណ្ឌា ព្រោះថាបើបង្អង់ វានឹងបាត់​បង់ឱកាស។

គួរបញ្ជាក់ផងដែរថា លោក Mark Zuckerberg មេធំ Facebook និងលោក Tim Cook មេធំ Apple បាន​និយាយដូចជាថា ឥណ្ឌាគឺជាទីផ្សារធំទី២របស់ខ្លួន ហើយទៅអនាគត់វានឹងអាចក្លាយជា​ទីផ្សារអាទិភាព៕​