អាមេរិក៖ ខណ:ពេលដែលពិភពលោកកំពុងតែតាមដានព្រឹត្តិការណ៍បង្ហាញវត្តមាន Samsung Galaxy Note 7 នោះ ស្រាប់តែក្រុមហ៊ុនស្រាវជ្រាវ និងវិភាគ Strategy Analytics បានលើកឡើងថា ស្មាតហ្វូនត្រកូល Galaxy គឺជាលក់​ដាច់​ច្រើនជាងគេបំផុត នៅពាក់កណ្ដាលឆ្នាំ២០១៦។

Strategy Analytic បានបង្ហាញរបាយការណ៍ស្រាវជ្រាវរបស់ខ្លួននៅថ្ងៃនេះថា Samsung Galaxy S7 Edge លក់បាន ១៣,៣លានគ្រឿងនៅជុំវិញពិភពលោក សម្រាប់​ពាក់កណ្ដាលឆ្នាំនេះ ចំណែក Galaxy J2 (2016) វិញ ក៏មិនអន់ដែរ ដោយលក់បាន ១៣លានគ្រឿង ពោលគឺចាញ់ S7 Edge តែបន្តិចប៉ុណ្ណោះ ខណ:ដែល Galaxy S7 លក់បាន ១១,៨លាន​គ្រឿង។

គួរបញ្ជាក់ផងដែរថា Samsung ជាក្រុមហ៊ុនផលិតស្មាតហ្វូនធំជាងគេបំផុត ដោយបច្ចុប្បន្នកំពុងវាយលុយយ៉ាងសាហាវ​នៅ​អឺរ៉ុប និងលោកខាងលិច ខណ:ដែល​ទីផ្សារប្រទេសចិនថមថយបន្តិច ដោយសារតែវត្តមានស្មាតហ្វូនក្នុងស្រុកលក់ក្នុងតម្លៃ​ទាបជាង តែគុណភាពប្រហាក់ប្រហែលគ្នា៕