ក្រុមហ៊ុនជប៉ុន Tesna Energy Co., Ltd ដឹកនាំដោយលោក Takahashi Fumiakk អតីតឯកអគ្គរដ្ឋទូតជប៉ុនប្រចាំកម្ពុជា បានបង្ហាញពីការចាប់អារម្មណ៍លើការវិនិយោគលើ ប្រព័ន្ធឡសម្រាប់ដុតកម្ទេចកាកសំណល់វេជ្ជសាស្រ្ត និងកាកសំណល់មានគ្រោះថ្នាក់ នៅកម្ពុជា។ នេះបើយោងតាមគេហទំព័រ ក្រសួងពាណិជ្ជកម្ម ចេញផ្សាយកាលពីម្សិលមិញនេះ។

គម្រោងនេះ គឺទទួលបានការគាំទ្រពីទីភ្នាក់ងារសហប្រតិបត្តិការជប៉ុន JICA ដែលផ្តោតលើការផលិតប្រព័ន្ធឡសម្រាប់ដុតកាកសំណល់ ដើម្បីទប់ស្កាត់ការបំភាយឧស្ម័នពុល Dioxin និងមិនប៉ះពាល់បរិស្ថាន។

ក្រុមហ៊ុនគ្រោងនឹងតម្លើងរោងចក្រផលិតប្រព័ន្ធនេះនៅក្នុងប្រទេសកម្ពុជា ដើម្បីផ្គត់ផ្គង់ដល់មន្ទីរពេទ្យក្នុងស្រុក និងនាំចេញទៅកាន់ប្រទេសផ្សេងៗ ខណៈបច្ចុប្បន្ន ក្រុមហ៊ុនកំពុងពិចារណាលើលក្ខខណ្ឌវិនិយោគ ជាពិសេសនីតិវិធីក្នុងការនាំចូលសម្ភារៈបរិក្ខា និងគោលការណ៍លើកទឹកចិត្ត។

លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ក៏បានស្វាគមន៍ចំពោះគម្រោងនេះ នឹងស្នើសុំតំណាងក្រុមហ៊ុនសិក្សាពីលទ្ធភាព ក្នុងការបំលែងកាកសំណល់ទៅជាថាមពលអគ្គិសនី ដើម្បីលើកកម្ពស់ថាមពលបៃតងនៅក្នុងប្រទេសកម្ពុជា។

ជាចុងក្រោយ ជប៉ុន បានសន្យានឹងទំនាក់ទំនងទៅកាន់ស្ថាប័នពាក់ព័ន្ធ ដើម្បីជំរុញគម្រោងនេះឲ្យដំណើរការក្នុងពេលឆាប់ៗនេះ ហើយគម្រោងនេះមិនត្រឹមតែកាត់បន្ថយផលប៉ះពាល់បរិស្ថានប៉ុណ្ណោះទេ ថែមទាំងជួយលើកកម្ពស់ការអភិវឌ្ឍន៍វិស័យឯកជនថែមទៀតផង៕