ប្រទេសទីម័រខាងកើត និងប្រទេសកូម៉ូរូស បានបង្ហាញពីចំណាប់អារម្មណ៍លើ ការទិញអង្ករ និងសំលៀកបំពាក់ពី កម្ពុជា។ នេះបើយោងតាមការឲ្យដឹងពី គេហទំព័ររបស់ក្រសួងពាណិជ្ជកម្ម កាលពីម្សិលមិញនេះ។

ប្រទេសទីម័រខាងកើត បានព្រមព្រៀងទិញអង្ករកម្ពុជាចំនួន ២០ម៉ឺនតោន ក្នុងមួយឆ្នាំ ប៉ុន្តែប្រទេសទាំង២ ពុំទាន់បានចុះ MoU ជាមួយគ្នានៅឡើយនោះទេ។

យ៉ាងណាមិញ ក្រសួងពាណិជ្ជកម្ម ក៏បានជម្រុញឲ្យ ប្រទេសទីម័រខាងកើត ចុះអនុស្សរណ: ជាមួយសភាពាណិជ្ជកម្មកម្ពុជា នៅខែឧសភា ខាងមុខ ដើម្បីជួយសម្រួលដល់ការផ្លាស់ប្តូរបទពិសោធន៍ ពង្រឹងសមត្ថភាពនាំចេញរបស់វិស័យឯកជន ព្រមទាំងការអភិវឌ្ឍ និងផ្សព្វផ្សាយឧស្សាហកម្មទេសចរណ៍ថែមទៀត។

ចំណែកឯ ប្រទេសកូម៉ូរូស​ ចាប់អារម្មណ៍ទិញអង្ករក្រអូប និងសម្លៀកបំពាក់ពីកម្ពុជា ដើម្បីផ្គត់ផ្គង់តម្រូវការប្រើប្រាស់ក្នុងស្រុក ប៉ុន្តែត្រូវការសិក្សាពី នីតិវិធីនាំចេញជាមុនសិន។

នៅក្នុងខែមករា ដើមឆ្នាំ ២០១៧ កម្ពុជា បាននាំអង្ករចេញប្រមាណជិត ៥ម៉ឺនតោន ទៅកាន់ប្រទេសចំនួន ៣៤។

តាមការសន្និដ្ឋាន បរិមាណអង្ករនាំចេញ មានការកើនឡើងនេះ ជាសញ្ញាល្អ ដើម្បីសម្រេចនូវគោលដៅរំពឹងទុករបស់រាជរដ្ឋាភិបាល ក្នុងការនាំចេញអង្ករឲ្យទទួលបានជោគជ័យ៕