ពិព័រណ៍កាហ្វេ និងយីហោអាជ្ញាប័ណ្ណ ឆ្នាំ ២០១៧ បានប្រារព្ធធ្វើឡើងជាលើកដំបូងបង្អស់ កាលពីព្រឹកនេះ ដើម្បីបង្កើតឲ្យមានការជួបជុំនៃ អាជីវកម្ម និងឧស្សាហកម្មសំខាន់ៗ មានដូចជា គ្រាប់កាហ្វេ កាហ្វេពិសេស តែ និងភេសជ្ជ: ម៉ាស៊ីនកាហ្វេ ម៉ាស៊ីនដុត និងលីងគ្រាប់កាហ្វេជាដើម។

នាឱកាសនេះ លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បានពន្យល់ឲ្យដឹងថា កម្ពុជា គួររៀនសូត្របន្ថែម ដើម្បីឈានទៅដល់ការបង្កើតយីហោកាហ្វេក្នុងស្រុក រួចលក់ Franchise ក្នុងស្រុក ព្រោះផលិតផលកាហ្វេកម្ពុជា​ មានគុណភាពខ្ពស់ ទាមទារឲ្យមានការកែច្នៃឲ្យបានល្អ សម្រាប់ផ្គត់ផ្គង់ក្នុងស្រុក និងនាំចេញទៅក្រៅប្រទេស។

លោកបានបន្តថា បើសិនជាយើងទិញយីហោកាហ្វេល្បីៗ មកពីបរទេស គឺត្រូវចំណាយដើមទុនច្រើនរហូតអាចដល់ រាប់លានដុល្លារ ហើយវាត្រូវលក់រាប់សែនកែវ ទម្រាំតែរួចខ្លួន ហើយបើដូច្នេះ គួរបង្កើតយីហោក្នុងស្រុក លក់ Franchise ក្នុងស្រុក អាចចំណេញច្រើនជាង។

អាជីវកម្មកាហ្វេនៅកម្ពុជា កំពុងចាប់ផ្តើមរីកចម្រើន ដាំដុះនៅលើផ្ទៃដីជិត ១ម៉ឺនហិកតា ក្នុងប្រមាណ ៥ខេត្ត ហើយមានក្រុមហ៊ុនតែមួយចំនួនប៉ុណ្ណោះ ផលិតជាម៉ាកសញ្ញាផ្ទាល់ខ្លួន។

យ៉ាងណាមិញ ពិព័រណ៍នេះធ្វើឡើង ក្នុងគោលបំណងលើកទឹកចិត្តឲ្យ កម្ពុជា អាចយល់ពីឧស្សាហកម្មផ្នែកនេះ សិក្សាបានច្រើនពី ឧបករណ៍បរិក្ខារ សម្រាប់ផលិតកាហ្វេធម្មជាតិរបស់កម្ពុជា ឲ្យកាន់តែល្អ កាន់តែឆ្ងាញ់ និងស្វែងយល់ពីឱកាសក្នុងការទទួលសិទ្ធិនិងអាជ្ញាបណ្ណបើកអាជីវកម្មម៉ាកយីហោល្បីៗ។

គួរជម្រាបដែរថា សម្រាប់ Franchise ហាងកាហ្វេទិញមកពីបរទេស ដែលកំពុងមានវត្តមាននៅកម្ពុជា​ គឺមានតិចជាង ១០ក្រុមហ៊ុន ហើយបច្ចុប្បន្នក្រសួងពាណិជ្ជកម្ម កំពុងព្រាងច្បាប់ស្តីពីកិច្ចសន្យា ដែលមានរាប់បញ្ចូល Franchise គ្រោងនឹងធ្វើឡើងនៅចុងឆ្នាំនេះផងដែរ៕