ផ្ទះ ព័ត៌មានសេដ្ឋកិច្ច ចាប់ពីថ្ងៃនេះ...

ចាប់ពីថ្ងៃនេះ ស្ពានបណ្តែតទឹក មុខប្រាសាទអង្គរវត្ត បើកឲ្យឆ្លងកាត់ជាផ្លូវការ

0

ចាប់ពីថ្ងៃនេះតទៅ ស្ពានបណ្តែតទឹកមុខប្រាសាទអង្គរវត្ត នឹងបើកឲ្យឆ្លងកាត់ជាផ្លូវការ ខណ:ស្ពានហាលឆ្លងទៅអង្គរវត្ត នឹងត្រូវបិទចរាចរណ៍ទាំងស្រុងរហូតដល់ឆ្នាំ ២០២០។ នេះបើយោងតាមការចេញផ្សាយរបស់ គេហទំព័រអាជ្ញាធរជាតិអប្សរា ប្រមាណជា ១០នាទីមុននេះ។

ស្ពានបណ្តែតទឹកនេះ ចាប់ផ្តើមបើកការដ្ឋានសាងសង់តាំងពីថ្ងៃទី ២៨ ខែវិច្ឆិកា ឆ្នាំ ២០១៦ ហើយនឹងដាក់សម្ពោធជាផ្លូវការ នៅថ្ងៃទី ២៥ ខែឧសភា ឆ្នាំ ២០១៧។

ស្ពាននេះ មានសមត្ថភាពគ្រប់គ្រាន់ធានាសុវត្ថិភាពដល់ភ្ញៀវទេសចរ ព្រោះអាចទ្រទ្រង់ទម្ងន់ដល់ទៅជាង ៤០០តោនក្នុងពេលតែមួយបាន។

ស្ពានហាលឆ្លងទៅប្រាសាទអង្គរវត្ត នឹងផ្អាកចរាចរណ៍ទាំងស្រុង ជំនួសដោយស្ពានបណ្តែតទឹក ដែលមានប្រវែង មានទទឹង ៨ម៉ែត្រ និងបណ្តោយ ១៧០ម៉ែត្រ។

ពោងបណ្តែតទឹក ប្រើប្រាស់ដើម្បីសាងសង់ស្ពាននេះ គឺយកមកពីប្រទេសកាណាដា ដែលមានការធានាគុណភាព និងសុវត្ថិភាពត្រឹមត្រូវ រយ:ពេល ៥ឆ្នាំ។

អាជ្ញាធរជាតិអប្សរា មានកិច្ចសហការជាមួយសាកលវិទ្យាល័យសូហ្វីយ៉ាប្រទេសជប៉ុន នឹងធ្វើការងារជួសជុលស្ពានហាលប្រាសាទអង្គរវត្ត ដំណាក់កាលទី ២ ដែលតម្រូវឲ្យបិទចរាចរណ៍ទាំងស្រុង។

ដូច្នេះភ្ញៀវទេសចរណ៍ជាតិ នឹងអន្តរជាតិ អាចឆ្លងកាត់ទៅទស្សនាប្រាសាទអង្គរវត្ត ដោយប្រើប្រាស់ស្ពានបណ្តែតទឹក ដែលស្ថិតនៅខាងត្បូងស្ពានហាលជំនួសវិញ ដើម្បីបញ្ជៀសនូវហានិភ័យ ដោយសារជួសជុល។

គួរបញ្ជាក់ដែរ គម្រោងបិទចរាចរណ៍ស្ពានហាល គឺដើម្បីអនុវត្តន៍គម្រោងជួសជុលប្រាសាទអង្គរវត្តឡើងវិញ ដែលដំណាក់កាលទី ១ ធ្លាប់បានធ្វើឡើងកាលពីឆ្នាំ ១៩៩៦ ដល់ ឆ្នាំ ២០០៧ ហើយដំណាក់ទី ២ នេះ អាចនឹងចាប់ផ្តើមនៅឆ្នាំក្រោយ នឹងបញ្ចប់នៅឆ្នាំ ២០២០៕

Loading...