ព័ត៌មានសេដ្ឋកិច្ច

៤ថ្ងៃទៀត អគារប៊ូឌីញ នឹងបាត់ពីផែនទីហើយ ជំនួសដោយអគារថ្មី

អគារប៊ូឌីញស នឹងបាត់ពី ផែនទី Google ក្រោយថ្ងៃទី ១៧ ខែកក្កដា នឹងត្រូវបានជំនួសដោយសំណង់ថ្មី។ នេះបើយោងតាមការឲ្យដឹងពី គេហទំព័ររបស់លោក ជា សុផារ៉ា រដ្ឋមន្រ្តីក្រសួងរៀបចំដែនដី និងនគរូបនីយកម្ម។

លោក បានរម្លឹកដែរថា អគារនេះ ត្រូវបានសាងសង់ក្នុងឆ្នាំ ១៩៦៣ ក្នុងសម័យសង្គមរាស្រ្តនិយម ដែលបានបង្ហាញពី ការរីកចម្រើននៃស្ថាបត្យកម្ម សម្រស់ និងជាកន្លែងសម្រាប់មន្រ្តីជាន់ខ្ពស់ស្នាក់នៅ។

យ៉ាងណាក៏ដោយ សល់ពេលតែ ៤ថ្ងៃទៀតប៉ុណ្ណោះ អគារនេះ នឹងត្រូវបានជំនួសដោយសំណង់អគារថ្មី ហើយជំនាន់នេះ និងជំនាន់ក្រោយ លែងបានឃើញទៀតហើយ។

គិតត្រឹមម្សិលមិញនេះ ប្រជាពលរដ្ឋ ជាម្ចាស់ចំណែកឯកជន ក្នុងអគារសហកម្មសិទ្ធិប៊ូឌីញស ចំនួន ៤៧៥បន្ទប់ បានទទួលប្រាក់ទូទាត់រួច និងបានប្រគល់បន្ទប់ជូនក្រុមហ៊ុន។

ចាប់ពីពេលនេះទៅ ពួកគាត់បានចាកចេញពីបន្ទប់ស្នាក់នៅ ទៅតាំងទីលំនៅថ្មី តាមបំណងប្រាថ្នា ហើយក្រុមហ៊ុនក៏បានឧបត្ថម្ភថវិកា ១០០ដុល្លារអាមេរិកសម្រាប់ការរើឥវ៉ាន់ចេញ​ ព្រមទាំងផ្តល់ជូនសារុង ១ និងក្រមា ១ ដែលជាអំណោយរបស់សម្តេចតេជោ ផងដែរ។

សម្រាប់ការអភិវឌ្ឍន៍អគារថ្មី ក្រសួង នឹងសហការជាមួយក្រុមហ៊ុន Arakawa ចាប់ផ្តើមសាងសង់លើគម្រោងសាងសង់អគារថ្មី ២១ជាន់ ដោយចំណាយទឹកប្រាក់ប្រមាណ ៨០លានដុល្លារអាមេរិក។

អគារថ្មីនេះ នឹងមានចំណតចំនួន ៣ជាន់, កន្លែងលក់ដូរ ១ជាន់ និងកន្លែងស្នាក់នៅ ៥ជាន់ ហើយចាប់ពីជាន់ទី ៩ឡើងទៅ ជាកម្មសិទ្ធិវិនិយោគរបស់ក្រុមហ៊ុន Arakawa៕

មតិយោបល់