ក្រុមការងារបច្ចេកទេសត្រីភាគីដើម្បីពិភាក្សាប្រាក់ឈ្នួលអប្បបរមា ផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ ២០១៨ បានធ្វើកិច្ចប្រជុំរួមគ្នា ចំនួន ៤លើកមកហើយ គិតមកទល់នឹងថ្ងៃនេះ។

យ៉ាងណាមិញ សម្រាប់លទ្ធផលនៃកិច្ចប្រជុំ ភាគីនីមួយៗនៃក្រុងការងារបច្ចេកទេសត្រីភាគី បានដាក់សំណើចុងក្រោយរបស់ខ្លួនដោយ ភាគីសហជីពស្នើសុំ ១៧០ដុល្លារ ភាគីនិយោជកស្នើសុំ ១៦២ដុល្លារ ខណៈភាគីរាជរដ្ឋាភិបាលសម្របសម្រួលដល់ ១៦៥ដុល្លារ។

យ៉ាងណាមិញ គណៈកម្មការប្រឹក្សាការងារ នឹងកោះប្រជុំ នៅថ្ងៃស្អែកនេះ ដើម្បីប្រជុំពិនិត្យសម្រេចលើ សំណើរបស់ភាគីនីមួយៗ។

គួររម្លឹកថា សម្រាប់ឆ្នាំ ២០១៧ ប្រាក់ឈ្នួលអប្បបរមា ១៥៣ដុល្លារ ត្រូវបានសម្រេចក្រោយការបោះឆ្នោត ជ្រើសរើសតួលេខ ១៤៨ដុល្លារអាមេរិក ហើយរាជរដ្ឋាភិបាលកម្ពុជា បានសម្រេចបន្ថែម ៥ដុល្លារអាមេរិកទៀត ដែលធ្វើឲ្យប្រាក់ឈ្នួលកម្មករ ឡើងដល់ ១៥៣ដុល្លារអាមេរិក។

ចាប់ពីឆ្នាំ ២០១៩តទៅ កម្មករនិយោជិតទាំងអស់ នឹងទទួលបានប្រាក់ចូលនិវត្តន៍ (ប្រាក់រឺ ត្រែត) ដូចមន្រ្តីរាជការដែរ​ ពោលគឺ ពេលមានកម្លាំងធ្វើការទទួលបានប្រាក់ខែ ហើយពេលចាស់ទៅធ្វើការមិនកើត ក៏មានប្រាក់រឺត្រែតដែរ។

ដើម្បីឲ្យស្របទៅនឹងកំណើនសេដ្ឋកិច្ចរបស់ប្រទេសកម្ពុជា ប្រាក់ឈ្នួលអប្បបរមាកម្មករ ផ្នែកវាយនភណ្ឌ កាត់ដេរ និងផលិតស្បែកជើង នឹងត្រូវដំឡើងរៀងរាល់ឆ្នាំ ដោយមិនរាប់បញ្ចូលប្រាក់បន្ថែមផ្សេងទៀត។

សម្រាប់ស្រ្តីជាកម្មការិនី មានផ្ទៃពោះ អាចឈប់បាន ១៥នាទីមុនម៉ោង និងត្រូវបានផ្តល់ប្រាក់បន្ថែម ១២០ភាគរយ សម្រាប់សម្រួលនៅពេលឆ្លងទន្លេ។

ទន្ទឹមនឹងនេះ​ សាលារាជធានីភ្នំពេញ នឹងផ្តល់សេវាឡានក្រុងសាធារណៈ ដោយឥតគិតថ្លៃ រយៈពេល ២ឆ្នាំ ដល់កម្មករ កម្មការិនីទាំងអស់ ដោយគ្រាន់តែបង្ហាញកាតការងារ។

ជាចុងក្រោយ ចាប់ពីខែមករា ឆ្នាំ ២០១៨ទៅ កម្មករនិយោជិតទាំងអស់ មិនចាំបាច់បង់ថ្លៃ ចំពោះសេវារបស់របបសន្តិសុខសង្គមផ្នែកថែទាំសុខភាពទៀតឡើយ គឺនិយោជក (ក្រុមហ៊ុន) នឹងទទួលរ៉ាប់រងលើចំណាយនេះទាំងអស់៕