ភ្នំពេញ: គណ:ប្រតិភូនៃព្រះរាជាណាចក្រកម្ពុជា បានស្នើឲ្យអ្នកវិនិយោគគិន និង ពាណិជ្ជករ ពីបណ្តាប្រទេសចំនួន៨០ មកបើកដំណើរការក្រុមហ៊ុនអាជីវកម្មនៅក្នុងប្រទេសកម្ពុជា។
សំណើនេះត្រូវបានធ្វើឡើង ក្រោយពេលដែលគណ:ប្រតិភូកម្ពុជា បានធ្វើការផ្សព្វផ្សាយ អំពីផលិតផលប្រទេសកម្ពុជា និងសក្តានុពលវិនិយោគកម្ពុជាទៅកាន់ភាគីចិន និងប្រទេសដដៃទៀត នៅក្នុងពិធីប្រកាសបើកពិព័រណ៌ពាណិជ្ជកម្មនាំចេញនាំចូល គុនមិញលើកទី២៤ និងពិព័រណ៌ពាណិជ្ជកម្មចិន-អាស៊ីខាងត្បូងលើកទី៤ ដែលបានប្រព្រឹត្តិទៅ ចាប់ថ្ងៃទី១២-១៧ខែ មិថុនា ឆ្នាំ២០១៦ នៅក្នុងទីក្រុងគុនមិញ ខេត្តយូណាន់ ប្រទេសចិន។
គណ:ប្រតិភូកម្ពុជាដឹកនាំដោយលោក ហោ ណាំហុង ឧបនាយករដ្ឋមន្ត្រីទទួលបន្ទុកកិច្ចពិសេសនៃព្រះរាជាណាចក្រកម្ពុជា និង លោក ឈួន តារា រដ្ឋលេខាធិការក្រសួងពាណិជ្ជកម្ម ដែលជាតំណាងដ៏ខ្ពង់ខ្ពស់របស់លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និង គណ:ប្រតិភូអមដំណើរ បានចូលរួមព្រឹត្តិការណ៍ ដ៏មានសារ:សំខាន់នេះ។
នៅក្នុងឱកាសនោះ លោក ហោ ណាំហុង និង លោក ឈួន ដារ៉ា ក៏បានជម្រុញ និងផ្សព្វផ្សាយផលិតផលកម្ពុជា និងសក្តានុពលវិនិយោគកម្ពុជា ទៅកាន់ភាគីចិន និងស្នើដល់អ្នកវិនិយោគគិន និង ពាណិជ្ជករចិន ព្រមទាំងបណ្តាប្រទេសចូលរួមទាំងអស់ ឲ្យមកបើកដំណើរការក្រុមហ៊ុនអាជីវកម្មនៅក្នុងប្រទេសកម្ពុជា ក៏ដូចជាការស្វែងរកដៃគួរពាណិជ្ជកម្ម និងធ្វើវិនិយោគរួមគ្នាផងដែរ ក្នុងគោលបំណង ពង្រឹងកិច្ចសហប្រតិបត្តិការណ៍សេដ្ឋកិច្ច និងពាណិជ្ជកម្មរវាង កម្ពុជា-ចិន និងបណ្តាប្រទេសដែលបានចូលរួមផ្សេងៗទៀតឲ្យកាន់តែមានភាពរឹងមាំ និងរីកចម្រើនទៅមុខ។
សូមបញ្ជាក់ថា ពិព័រណ៌ខាងលើនេះ មានប្រទេសចួលរួម៨០ប្រទេស ដែលមកពីតំបន់អាស៊ីអាគ្នេយ៍ អាស៊ីខាងត្បូង អឺរ៉ុប អាមេរិក និងតំបន់ផ្សេងៗទៀត។ ក្នុងនោះមានស្តង់ពាណិជ្ជកម្មទាំងអស់ចំនួន ៨០០០ស្តង់ ហើយប្រទេសកម្ពុជា បានសាងសងស្តង់ពន្លាជាតិមួយ ដោយដឹកនាំពាណិជ្ជករចូលរួមចំនួន៤០ស្តង់ និងមានសិល្បករ សិល្បការីនីកម្ពុជា ទៅសម្តែងសិល្ប: ដើម្បីផ្សព្វផ្សាយវប្បធម៌ និងរបាំបុរាណខ្មែរ ជួនភ្ញៀវទស្សនាជារៀងរាល់ថ្ងៃ៕
មតិយោបល់