ការពពោះ៩ខែ១០ថ្ងៃ មិនមែនជារឿងលេងសើចនោះទេ ព្រោះមនុស្សស្រីត្រូវឆ្លងកាត់ផលលំបាក់រាប់មិនអស់។ ប៉ុន្តែទន្ទឹមនឹងនេះ អ្នកក៏ត្រូវតែចេះរក្សាសុខភាពឲ្យបានល្អផងដែរ បើមិនដូច្នោះទេ អ្នកអាចបាត់បង់កូនទៅវិញ ឬកូនកើតមានបញ្ហាមិនប្រក្រតីក៏ថាបាន។ បើយោងតាមគេហទំព័រ pregnancyvideo បានបង្ហាញថា ស្ត្រីមានផ្ទៃពោះគួរជៀសវាងរឿងសំខាន់ៗ៤ចំណុច ព្រោះវាអាចបង្កឲ្យមានគ្រោះថ្នាក់ដល់កូន និងម្តាយ។
១.ការជក់បារី
ប្រសិនបើអ្នកជក់បារី សារធាតុកាបូនម៉ូណីអុកស៊ីត នីកូទីន និងសារធាតុគីមីពុលផ្សេងៗទៀត ដែលមាននៅក្នុងផ្សែងបារី នឹងឆ្លងកាត់តាមទងសុក ចូលទៅក្នុងឈាមរបស់ទារកដោយផ្ទាល់។ ជាពិសេសសាធាតុទាំងនេះ អាចធ្វើឲ្យទារកខ្វះអុកស៊ីសែន ខ្វះសារធាតុចិញ្ចឹម ទារកកើតមកមានទម្ងន់ស្រាល កើតមិនគ្រប់ខែ ហើយបើធ្ងន់ធ្ងរអាចរលូតក៏មាន។ ហេតុដូច្នេះ អ្នកគួរតែបញ្ឈប់ការជក់បារី ប្រសិនបើចង់ឲ្យកូនមានសុខភាពល្អ។
២.ការទទួលទានភេសជ្ជៈ
មិនថាកាហ្វេ ឬភេសជ្ជៈប៉ូវកម្លាំងផ្សេងៗនោះទេ អ្នកម្តាយមានផ្ទៃពោះត្រូវតែជៀសវាង ព្រោះវាជាភ្នាក់ងាររំញោច ដែលអាចបណ្តោលឲ្យទារកក្នុងផ្ទៃមានបញ្ហាផ្សេងៗកើតឡើង។
៣.ការទទួលទានស្រា
ការទទួលទានស្រាច្រើនពេក អាចបណ្តោលឲ្យរលូត ទារកខូចទ្រងទ្រាយ និងមានបញ្ហាផ្លូវអារម្មណ៍ នៅពេលកើតមក។ យកល្អ អ្នកម្តាយគួរជៀសវាងការទទួលទានស្រាឲ្យបាន ព្រោះទារកកំពុងតែអភិវឌ្ឍ គឺងាយនឹងទទួលរងនូវផលប៉ះពាល់ខ្លាំងណាស់។
៤.ការប្រើប្រាស់ថ្នាំ
ថ្នាំ គឺជាអាវុធមុខពីរដែលអាចបំផ្លាញ់ជីវិតរបស់អ្នកបាន ប្រសិនបើអ្នកមិនគោរពតាមវេជ្ជបញ្ជា។ ដូចគ្នានេះផងដែរ ស្ត្រីមានផ្ទៃពោះមិនគួរប្រើថ្នាំផ្តេសផ្តាសតាមតែអំពើចិត្តនោះទេ បើគ្មានការចេញវជ្ជបញ្ជាពីគ្រូពេទ្យ ព្រោះវាអាចបង្កឲ្យមានផលអាក្រក់ ទាំងអ្នកម្តាយ និងកូនក្នុងផ្ទៃ៕
មតិយោបល់