បរទេស: ខ្យល់ដង្ហើមមិនល្អ អាចកើតមានទ្បើងសម្រាប់អ្នកទាំងអស់គ្នា គ្រប់ពេលវេលា ដែលវាបណ្ដាលមកពីកត្តាជាច្រើនដូចជា មាត់ស្ងួត អាហារប្រូតេអ៊ីនខ្ពស់ ជាតិស្ករ ឬទឹកអាស៊ីត ជក់បារី និងជំងឺពុកធ្មេញជាដើម អាចជាកត្តាមួយ ធ្វើឲ្យអ្នកមានខ្យល់ដង្ហើមមិនល្អ។ តើគួរតែធ្វើដូចម្ដេច ទើបអាចបំបាត់បញ្ហានេះបាន?
១. ធ្វើការដុសធ្មេញ
ការដុសសម្អាតធ្មេញឲ្យបានត្រឹមត្រូវ ជារឿងល្អបំផុត ក្នុងការប្រយុទ្ធប្រឆាំងនឹងបញ្ហាមាត់មានក្លិន ឬខ្យល់ដង្ហើមមិនល្អ។ ហេតុដូចនេះ អ្នកតែដុសធ្មេញ យ៉ាងហោចណាស់ពីរដងក្នុងមួយថ្ងៃ ដោយប្រើរយ:ពេលដុសពីរនាទី ដើម្បីធ្វើប្រាកដថា តំបន់ទាំងអស់នៃធ្មេញ និងក្នុងមាត់របស់អ្នកស្អាត។
២. ប្រើសសៃអំបោះរូសធ្មេញឲ្យបានញឹកញាប់
អាហារដែលនៅសល់ ឬជាប់នៅចន្លោះធ្មេញ អាចបន្ថែមបញ្ហាក្លិនមាត់បាន ហេតុដូចនេះ អ្នកគួរតែប្រើសសៃអំបោះរូសធ្មេញឲ្យបានញឹកញាប់ ទើបជាការប្រសើរ។
៣. ប្រើម្សៅ baking soda
ព្យាយាមប្រើម្សៅ baking soda ដុសសម្អាតធ្មេញរបស់អ្នកឲ្យបានម្ដងក្នុងមួយសប្តាហ៍ នឹងជួយបន្សាបជាតិបាក់តេរី ដែលបណ្តាលឲ្យមានខ្យល់ដង្ហើមអាក្រក់។
៤. គួរជៀសវាងនូវប្រភេទអាហារមួយចំនួន
ខ្ទឹមបារាំង និង ខ្ទឹមស គឺជាមូលហេតុដ៏ចម្បងមួយ។ វិធីតែម្យ៉ាងដែលអ្នក អាចជៀសវាងនូវបញ្ហានេះបាន អ្នកមិនត្រូវទទួលទានខ្ទឹមស និង ខ្ទឹមបារាំង ជាពិសេសមុនពេលដែលអ្នកត្រូវ ទៅធ្វើការ ឬ ចូលក្នុងព្រឹត្តិការណ៍ផ្សេងៗ ប្រសិនបើអ្នកមានការព្រួយបារម្ភអំពីក្លិនមាត់របស់អ្នក។
៥. ចោលទំលាប់នៃការជក់បារី
ការជក់បារីអាចបំផ្លាញដល់ ជាលិការបស់អញ្ចាញធ្មេញ និង ធ្វើឲ្យធ្មេញមានពណ៌មិនល្អ ដែលវាអាចនឹងបង្កើនហានិភ័យ នៃការប្រឈមនិងជំងឺមហារីកក្នុង ក្រអូមមាត់បានផងដែរ។
៦. ធ្វើការខ្ពុលមាត់
ការប្រើទឹកលាងសំអាតមាត់ អាចជួយប្រឆាំងនឹងពួកបាក់តេរី ដោយបន្ថែមនូវ ការការពារ និងកាត់បន្ថយសារជាតិកំណកកំបោរ ដែលបង្កឲ្យមានបាក់តេរី៕
មតិយោបល់