កាលពីប៉ុន្មានថ្ងៃមុននេះ អង្គការសុខភាពពិភពលោក WHO បានប្រកាសដំណឹងដ៏គួរឲ្យព្រួបារម្ភមួយ អំពីមរោគរាតត្បាតកាចសាហាវដែលមានឈ្មោះថា Marburg បានផ្ទុះឡើងសារជាថ្មីនៅប្រទេស អ៊ូហ្គង់ដា និងកេនយ៉ា។ បើយោងតាមទីភ្នាក់ងារអង្គការនេះបានឲ្យដឹងថា ករណីដំបូងដែលក្រសួងសុខាភិបាល អ៊ូហ្គង់ដា រាយការណ៍កាលពីថ្ងៃទី ៣ខែវិច្ឆិកា មានមនុស្ស៣នាក់ដែលឆ្លងមេរោគ Marburg ហើយក្នុងចំណោមពួកគេបានស្លាប់ម្នាក់ មុននឹងបញ្ជូនទៅដល់ប្រទេសកេនយ៉ា។ ដូច្នេះប្រទេសនេះក៏ស្ថិតនៅក្នុងតំបន់ដែលគ្រោះថ្នាក់ផងដែរ។

បន្ទាប់ពី៣ករណីដំបូង មានមនុស្សជាច្រើនណាស់ដែលបានទាក់ទងជាមួយនឹងអ្នកជំងឺ រួមទាំងបុគ្គលិកសុខាភិបាល ក៏ត្រូវស្ថិតនៅក្រោមការពិនិត្យតាមដានដែរ។

មេរោគ Marburg និង អេប៊ូឡា (Ebola) គឺជាប្រភេទនៃជំងឺដែលស្ថិតនៅក្នុងត្រកូលតែមួយ។ បើយោងតាមរបាយការណ៍អង្គការសុខភាពពិភពលោក បង្ហាញថា ជនរងគ្រោះដោយសារតែមរោគ Marburg នេះមានអត្រានៃការស្លាប់ចាប់ពី ២៣ភាគរយរហូតដល់ទៅ ៩០ភាគរយ ខណ:ដែលរបាយការណ៍ផ្សេងទៀតបានបង្ហាញថា អត្រាមរណជាមធ្យមគឺ ៨៨ភាគរយ។

មេរោគ Marburg ត្រូវបានគេរកឃើញថា អាចចម្លងពីមនុស្សម្នាក់ទៅមនុស្សម្នាក់ទៀតតាមរយ:ឈាម និងសារធាតុរាវ ដែលអាចបង្កឲ្យមនុស្សប្រឈមនឹងការស្លាប់រាប់រយដង។ តែគួរឲ្យស្តាយរហូតមកដល់ពេលនេះ ក្រុមអ្នកស្រាវជ្រាវមិនទាន់រកឃើញវ៉ាក់សាំង ឬឱសថព្យាបាលជាក់លាក់នៅឡើយទេ។

មេរោគនេះ ផ្ទុះឡើងដំបូងក្នុងឆ្នាំ ១៩៦៧នៅប្រទេសអាល្លឺម៉ង់ និងអតីតយូហ្គោស្លាវី ហើយរីករាលដាល់មកដល់ប្រភទេសអ៊ូហ្គង់ដា តាមរយ:សត្វស្វា។

បច្ចុប្បន្ននេះ អង្គការពិភពលោក កំពុងតែធ្វើការជាមួយនឹងបណ្តោលប្រទេសដែលពាក់ព័ន្ធនឹងមេរោគនេះ ដើម្បីរកវិធីទប់ស្កាត់កុំឲ្យមានការរីករាលដាលបន្តទៀត៕

ប្រភព៖ dailymail