ភ្នំពេញ: រដូវភ្លៀងជិតឈានចូលមកដល់នោះ នាយកដ្ឋានប្រយុទ្ធ នឹងជំងឺឆ្លង នៃក្រសួងសុខាភិបាលបាន បានអំពាវនាវ ឲ្យប្រជាពលរដ្ឋមានការប្រុងប្រយ័ត្ន និងការពារចំពោះ ជំងឺ៧មុខ និងជំរុញឲ្យប្រជាពលរដ្ឋ ចេះថែរក្សាសុខភាព ឲ្យបានល្អជៀសវាងការឆ្លង នៃជំងឺទាំងនោះ។

នេះបើយោងតាមគេហទំព័រ របស់នាយកដ្ឋានប្រយុទ្ធ នឹងជំងឺឆ្លងនៃក្រសួងសុខាភិបាល ចេញផ្សាយកាលពីថ្ងៃទី២៥ ខែមេសា ឆ្នាំ២០១៦នេះ។

ប្រភពដដែល បានបញ្ជាក់ថា ជំងឺ៧មុខ ដែលអាចកើតមានជាញឹកញាប់ ក្នុងរដូវភ្លៀងធ្លាក់មានជំងឺគ្រុនឈាម គ្រុនចាញ់ ផ្តាសាយ គ្រុនក្តៅ ជំងឺចំលងពីចំណីអាហារ ចំលងពីទឹក អាសន្នរោគ លឹបតូ ជាពិសេស ពេលមានទឹកលិច (ចំលងពីទឹកនោមសត្វកណ្តុរ មានរោគសញ្ញាគ្រុនក្តៅ ឈឺក្បាល ឈឺសាច់ដុំ ក្អួត លឿងស្បែក ក្រហមភ្នែក ឈឺពោះ កន្ទួលលើស្បែក។ មិនបានព្យាបាល ត្រឹមត្រូវអាចវិវត្តន៍ ខូចតម្រងនោម ថ្លើម រលាកស្រោមខួរ និងវិបត្តិដង្ហើម។

នាយកដ្ឋាន បានអំពាវនាវឲ្យប្រជាពលរដ្ឋ មានការប្រុងប្រយ័ត្ន និងជំងឺទាំង ៧ប្រភេទនេះ ដោយបានបង្ហាញ អំពីវិធាន៧យ៉ាង ក្នុងពេលរដូវភ្លៀងផងដែរ ទី១. ត្រូវរក្សាអាវភ្លៀង ឆ័ត្រ និងស្បែកជើងលុយទឹកជានិច្ច, ទី២. ត្រូវងូតទឹកក្រោយពីត្រូវទឹកភ្លៀង , ទី៣. ផឹកទឹកក្តៅ ទឹកស៊ុប ទឹកដោះគោក្តៅ , ទី៤. អនាម័យខ្លួនប្រាណ និងឧស្សាហ៍លាង ដៃសាប៊ូ និងទឹក បំបាត់ដង្កូវទឹក ជម្រកមូស , ទី៥. ផឹកទឹកឲ្យបានច្រើន យ៉ាងតិច២លីត្រក្នុង១ថ្ងៃ , ទី៦. បរិភោគអាហារ ប្រកបដោយ ជីវជាតិនិងអនាម័យ និងជៀសវាងបរិភោគ ក្រោមដំណក់ទឹកភ្លៀង និងទី៧. បរិភោគអាហារសំបូរ វីតាមីនសេ ត្របែក ល្ហុងទុំ ចេកទុំ ក្រូចពោធិ៍សាត់ ស្ត្រូបីរី (Strawberries) បន្លែពណ៌បៃតងចាស់ ដូចជា ផ្ទី ស្លឹកងប់ ស្លឹកបាស ខាត់ណា សណ្តែកគួរ ប៉េងប៉ោះ ជាដើម៕