Post News Media ព័ត៌មានអន្តរជាតិ ប្រធានាធិបតី​...

ប្រធានាធិបតី​ដែលចង់កាន់អំណាចមួយពាន់ឆ្នាំ!! ពេលនេះយល់ព្រមចុះចេញពីតំណែងហើយ

ហ្គំប៊ី: ប្រធានាធិបតី​ដែលចង់គ្រប់គ្រងអំណាចឲ្យបាន ១០០០ឆ្នាំរបស់​ប្រទេស​ហ្គំប៊ី លោក Yahya Jammeh បានយល់ព្រមផ្ទេអំណាច ដោយសន្តិវិធី និងចាកចេញពីប្រទេសហើយ ក្រោយមានសម្ពាធពីបរទេស។ នេះយោងតាមសារយ:សារព័ត៌មាន BBC ចេញផ្សាយនៅថ្ងៃទី ២១ ខែមករា ឆ្នាំ២០១៧។

ការ​សម្រេច​ចិត្ត​របស់​លោក​ Jammeh ​ត្រូវ​បាន​ធ្វើ​ឡើង ​បន្ទាប់​ពី​ប្រធានាធិបតី​ហ្គីណេ លោក ​Alpha Conde ​និង​ប្រធានាធិបតី​ម៉ូរីតានី​ លោក ​Mohamed Ould Abdel Aziz បាន​ទៅ​ដល់​រដ្ឋធានី​បង់ហ្សុល​ កាល​ពី​ព្រឹក​ថ្ងៃ​សុក្រ ដើម្បី​បញ្ចុះបញ្ចូល​លោក​ Jammeh ឲ្យ​ផ្ទេរ​អំណាច​ដោយសន្តិវិធី បើ​មិន​ដូច្នោះ​ទេ ​លោក​នឹង​ត្រូវ​ប្រឈម​​ចំណាត់ការ​ផ្លូវ​យោធាអាហ្វ្រិក​ខាង​លិច​ ដែល​មាន​សមាជិក​១៥​ប្រទេស ​ហៅ​កាត់​ថា ECOWAS វាយកម្ទេចតែម្តង។

លោក ​Marcel Alain de Souza ​ប្រធាន ​ECOWAS​ បាន​និយាយ​ថា​ ប្រធានាធិបតី​ហ្គីណេ លោក ​Conde​ អាច​ផ្តល់​ឱកាស​ដល់​លោក Jammeh ដើម្បី​ផ្ទេរ​អំណាច​ដោយ​សន្តិវិធី។ លោក​បាន​និយាយ​ថា ប្រសិន​បើ​ដំណើរការ​នេះ​បរាជ័យ យើង​នឹង​ទម្លាក់​លោក​ពី​តំណែង ​ដោយ​ប្រើប្រាស់​កម្លាំង​យោធាតែម្តង។

មេដឹកនាំ​នៃ​បណ្តា​ប្រទេស​អាហ្វ្រិក​ខាង​លិច ​បាន​ទុក​ពេលវេលា​ឲ្យ​លោក Jammeh ដល់​ពាក់​កណ្តាល​អាធ្រាត្រ​ម៉ោង​ក្នុង​ស្រុក​ ដើម្បី​ផ្ទេរ​អំណាចដោយសន្តិវិធីទៅឲ្យប្រធានាធិបតីថ្មី លោក Adama Barrow នៅត្រឹមម៉ោង ៤ រសៀល ថ្ងៃសុក្រ(ម៉ោងក្នុងប្រទេសហ្គំប៊ី) រួចចាកចេញពីប្រទេស។

សូមជំរាបថា លោក Adama Barrow បាន​ស្បថ​ចូល​កាន់​តំណែង​ កាល​ពី​ថ្ងៃ​ព្រហស្បតិ៍ ​នៅ​​ស្ថានទូត​ហ្គំប៊ី ​ក្នុង​ប្រទេស​សេណេហ្កាល់ ​ខណ:ដែល​លោក​មិន​អាច​ស្បថ​ចូល​កាន់​តំណែង ​នៅ​ក្នុង​រដ្ឋធានី​នៃ​ប្រទេស​ហ្គំប៊ី​បាន៕

លោក Yahya Jammeh

លោក Adama Barrow ប្រធានាធិបតីថ្មី