ស្រីលង្កាៈ កងកម្លាំងទាហានក្នុងស្រុក បាននិយាយថា ចំនួនមនុស្សស្លាប់ បានកើនទ្បើងដល់ ១៦ នាក់ហើយ ស្របពេលដែលមនុស្ស ជាច្រើននាក់ទៀតរងបួស ក្នុងឧប្បត្តិហេតុរអិលបាក់ដី ដោយសារភ្លៀងធ្លាក់យ៉ាងខ្លាំង នៅស្រុក Aranayake ប្រទេសស្រីលង្កា។ នេះបើយោងតាមរយៈ សារព័តមានចិនស៊ិនហួរ ចេញផ្សាយនៅថ្ងៃទី១៨ ខែឧសភា ឆ្នាំ២០១៦។

មកទល់ពេលនេះ មនុស្សចំនួន ១៥០ នាក់ ត្រូវបានជួយសង្គ្រោះបន្ទាន់ និងសាកសពចំនួន ៥ ត្រូវបានក្រុមជួយសង្គ្រោះ ស្វែងរកឃើញ ខណៈដែលជាង ២០០ គ្រួសារទៀត កំពុងបាត់ខ្លួន។

មន្ត្រីគ្រប់គ្រងគ្រោះមហន្តរាយ បាននិយាយថា ផ្ទះចំនួន ១១៤ ខ្នងត្រូវបានបំផ្លាញ ស្របពេលដែលមនុស្សចំនួន ២០០.០០០ នាក់ កំពុងរងផលប៉ះពាល់ ដោយសារគ្រោះទឹកជំនន់ និង ១៣៧.០០០នាក់ទៀត ត្រូវបានជម្លៀសទៅកាន់ទីកន្លែងសុវត្ថិភាព៕