ខេត្តកណ្តាលៈ មុខសញ្ញាចោឆក់ពីរនាក់ ត្រូវប៉ូលិសនិងប្រជាការពារក្រុងតាខ្មៅ ចាប់ក្របួចជាប់ បន្ទាប់ពីធ្វើសកម្មភាពឆក់កាបូបពីស្រ្តីម្នាក់បានសម្រេច ហើយព្យាយាមជិះម៉ូតូគេចខ្លួនកាលពីវេលាម៉ោង៩និង២៥នាទីថ្ងៃទី០៤ ខែមិថុនា ឆ្នាំ២០១៦ ត្រង់ចំណុចមុខហាង៩៩៩ ក្នុង ភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល។

អធិការនគរបាលក្រុងតាខ្មៅបានឲ្យដឹងថា ជនសង្ស័យត្រូវឃាត់ខ្លួននោះទី១ឈ្មោះ គិត តុលា ភេទប្រុស អាយុ១៩ឆ្នាំជាអ្នកធ្វើសកម្មភាពឆក់យកការបូប។ ទី២ឈ្មោះ ចាន់ រតនាភេទប្រុស អាយុ២៥ឆ្នាំជាអ្នកបើកម៉ូតូ។ ជនសង្ស័យទាំង២នាក់មានទីលំនៅភូមិមិនពិតប្រាកដ។មធ្យោបាយធ្វើសកម្មភាពម៉ូតូស្កូបពីគ្មានស្លាកលេខ។

ស្រ្តីរងគ្រោះឈ្មោះ គង់ ស្រីសៀង អាយុ២៥ឆ្នាំ មានទីលំនៅភូមិស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ រាជធានីភ្នុំពេញ។ នៅមុនពេលកើតហេតុស្រ្តីរងគ្រោះជិះម៉ូតូស្កូបពីម្នាក់ឯងក្នុងទិសដៅពីភ្នំពេញមកតាខ្មៅ លុះមកដល់មុខភោជនីដ្ឋាន៩៩៩ សង្កាត់ដើមមៀនក្រុងតាខ្មៅ ស្រាប់តែឃើញម៉ូតូមួយគ្រៀងម៉ាកស្កូបពីគ្មានស្លាកលេខជិះឌុបគ្នា២នាក់ មក ធ្វើសកម្មភាពឆក់កាបូប ហើយជិះចូលតាមផ្លូវបេតុងក្នុងភូមិព្រែកតាពៅ១ ពេលនោះកម្លាំងប្រជាការពារ និងកម្លាំងនគរបាលក្រុងតាខ្មៅស្ទាក់ចាប់បានភ្លាមៗ។

បញ្ជាក់ថា ស្ត្រីរងគ្រោះពេលត្រូវជនសង្ស័យឆក់កាបូប គឺមិនមានដួលម៉ូតូទេ បានបើកម៉ូតូដេញតាមជនសង្ស័យ និងស្រែកហៅគេឯងឲ្យជួយអន្តរាគមន៍។

បច្ចុប្បន្នជនសង្ស័យទាំង២ខាងលើ ត្រូវបានកម្លាំងជំនាញធ្វើការសាកសួរ និងកសាងសំណុំរឿងចាក់ការតាមនិតិវិធី៕