អង់គ្លេសៈ Roberto Carlos អតីតខ្សែការពារឆ្នើមរបស់ក្រុម Real Madrid បានបញ្ចេញយោបល់ថា កីឡាករ Cristiano Ronaldo ពិតជាស័ក្ដិសមបំផុតហើយសម្រាប់ក្លាយជាម្ចាស់ពាន FIFA Ballon dOr ក្នុងឆ្នាំនេះ ដោយមិនចាំបាច់គិតដល់រឿងជួយប្រទេសនៅ Euro 2016 ទេ។

អតីតកីឡាកររបស់ជម្រើសជាតិប្រេស៊ីលរូបនេះ បាននិយាយថា “Ronaldo នឹងឈ្នះពាន Ballon dör ដោយមិនចាំបាច់គិតដល់រឿង Euro 2016 ខាងមុខនេះទេ។ ជួយក្រុមឈ្នះពាន UEFA Champions League ហើយជាអ្នករកគ្រាប់បាល់បានច្រើនជាងគេនៅក្នុងពានរង្វាន់មួយនេះ គឺគ្រប់គ្រាន់ហើយ… Messi ជាកីឡាករល្អ ប៉ុន្តែរឿង Champions League ជារឿងសំខាន់”។

អតីតខ្សែបម្រើពូកែខាងលេងបាល់វែងរូបនេះ បន្តថា នៅប៉ុន្មានឆ្នាំខាងមុខនេះ កីឡាកររួមសញ្ជាតិ Neymar នឹងឡើងដល់ចំណុចកំពូលមួយ ដែលអាចជំនួស Messi និង Ronaldo បាន ហើយលើកពាន FIFA Ballon dOr ជូនជនជាតិប្រេស៊ីល។

ខ្សែប្រយុទ្ធសញ្ជាតិព័រទុយហ្គាល់ Ronaldo ជាកីឡាករសំខាន់ខ្លាំងរបស់ Real Madrid ក្នុងរដូវកាលនេះ ហើយក៏ជាតួអង្គដែលជួយក្រុមលើកពាន Champions League បានដែរ ពោលគឺមួយរដូវកាលនេះ រូបគេរកបាន១៦គ្រាប់ ក្នុងការបង្ហាញខ្លួន១២ប្រកួត៕