ថៃ: យោងតាមសារព័ត៌មាន Spring News បានរាយការណ៍ឲ្យដឹងថា កាណូតពីរគ្រឿងបានបុកគ្នាយ៉ាងពេញទំហឹង​នៅក្នុង​សមុទ្រនៃកោះភូកេត នៅភាគខាងត្បូងប្រទេសថៃ បានសម្លាប់មនុស្សពីរនាក់ និងភ្ញៀវទេសចរ ២៦នាក់រងរបួសធ្ងន់ស្រាល។ នេះបើយោងតាម​សារព័ត៌មានចិនស៊ិនហួរ ចេញផ្សាយនៅថ្ងៃទី៨ មិថុនានេះ។

កាណូតបុកគ្នានេះ បានកើតឡើងនៅម៉ោងប្រហែល ២រសៀល ​ត្រូវនឹងម៉ោងក្នុងស្រុក នៅពេលដែលកាណូតពីរគ្រឿងនេះ បានធ្វើដំណើរមកពី​កោះ​ភូកេត ទៅកាន់កោះ Mu Koh Phi Phi ដោយសារវាស្ថិតនៅក្នុងស្ថានភាពព្យុះភ្លៀងទើបធ្វើឲ្យបុកគ្នាតែម្តង។ ហើយអ្នកដំណើរភាគច្រើន គឺចិននិងកូរ៉េខាងត្បូង។

ប៉ូលិសបាននិយាយថា កាណូតឈ្មោះ Chollakij បានដឹកអ្នកដំណើរចំនួន ៣៦នាក់ និងកាណូតមួយគ្រឿងទៀតឈ្មោះ Hongfah បានដឹកអ្នក​ដំណើរចំនួន ៣៣៣នាក់ បានបុកគ្នាក្រឡាប់ពេញទំហឹងដែលបានបណ្តាលឲ្យមនុស្ស ២៦នាក់រងរបួសធ្ងន់ស្រាល នៅជិតតំបន់ Moo Snakha Rocks នៅចំពេលមានរលកវាយប្រហារបក់បោកយ៉ាងខ្លាំង។

ប្រព័ន្ធផ្សព្វផ្សាយក្នុងស្រុកបាននិយាយថា ភ្ញៀវទេសចរពីរនាក់ រួមទាំងបុរសម្នាក់និងស្ត្រីម្នាក់បានសម្លាប់ និង២៦ នាក់ផ្សេងទៀតបានរងរបួសធ្ងន់​ស្រាល ដោយបានបញ្ជូនទៅមន្ទីរពេទ្យដើម្បីសម្រាកព្យាបាលផងដែរ។

ភូកេតគឺជាកោះមួយនៃបណ្តាខេត្តភាគខាងត្បូងនៅប្រទេសថៃ។ ហើយកោះភូកេតនេះ ជាកោះមួយនៅក្នុងចំណោមកោះតូចៗជាច្រើនទៀត ដូច្នេះ​គេហៅផងដែរថា​ សមុទ្រគុជខ្យង Andaman ជាកោះធំបំផុតរបស់ប្រទេសនេះ ហើយវាក៏នៅមានកោះតូចៗចំនួន ៣២ទៀត​នៅជុំវិញកោះធំនេះ​ផងដែរ។ ដូច្នេះវាស្ថិតនៅឯនាយឆ្នេរខាងលិចរបស់ប្រទេសថៃ ក្នុងសមុទ្រ Andaman។

សូមបញ្ជាក់ថា សេចក្តីលម្អិតនិងមូលហេតុនៃគ្រោះថ្នាក់នាវាចរណ៍នេះ កំពុងស្ថិតក្រោមការស៊ើបអង្កេតនៅឡើយ៕