ក្រិច: រដ្ឋមន្រ្តីការបរទេសលោក Nikos Kotzias បាននិយាយនៅថ្ងៃសៅរ៍នេះថា ប្រទេសក្រិកគាំទ្រ​គោលបំណងរដ្ឋធម្មនុញ្ញនៅក្នុងប្រទេសតួកគី បន្ទាប់ពីរដ្ឋាភិបាលតួកគីស្នើដល់ក្រិក ដើម្បីធ្វើបត្យាប័នបញ្ជូនពួកផ្សំគំនិត​ធ្វើរដ្ឋ​ប្រហារយោធា ៨នាក់មកតួកគីវិញ បន្ទាប់ពីការប៉ុនប៉ងធ្វើរដ្ឋប្រហារយោធាមួយកាលពីថ្ងៃសុក្រ​ នៅក្នុងប្រទេសមជ្ឈឹម​ភាគ​ខាង​កើត​។ នេះបើយោងតាមការចេញផ្សាយដោយសារព័ត៌មានចិនស៊ិនហួ នៅយប់ថ្ងៃទី១៦ កក្កដា ឆ្នាំ២០១៦នេះ។

ការកត់សម្គាល់នេះត្រូវបានធ្វើឡើងដោយលោក Kotzias ក្នុងអំឡុងពេលការហៅទូរស័ព្ទមួយជាមួយសមភាគីតួកគីរបស់លោក Mevlut Cavusoglu ក្រោយពីរដ្ឋប្រហារនៅតួកគី ដែលបានរាយការណ៍ថាបានសម្លាប់មនុស្សយ៉ាងហោចណាស់ ១៩៤នាក់​និងរងរបួសជាង ១.១៥៤នាក់ផ្សេងទៀតរហូតមកពេលនេះ។

បើយោងតាមសេចក្តីប្រកាសមួយក្រសួងការបរទេសក្រិចបានឲ្យដឹងថា ប្រទេសក្រិកថ្កោលទោសចំពោះការប៉ុនប៉ងធ្វើរដ្ឋប្រហារ​ណាមួយនិងការគាំទ្រការតស៊ូដើម្បីលទ្ធិប្រជាធិបតេយ្យនិងការការពារនៃរដ្ឋធម្មនុញ្ញរបស់ប្រជាជនតួកគី។

ទីភ្នាក់ងារជាតិ AMNA ដែលបានដកស្រង់ប្រភពរដ្ឋាភិបាលបាននិយាយថា លោកប្រធានាធិបតីក្រិច Prokopis Pavlopoulos និងលោកនាយករដ្ឋមន្ត្រី Alexis Tsipras ត្រូវបានគេរំពឹងថា នឹងទាក់ទងទៅសមភាគីតួកគីរបស់ពួកគេ ដែលពុំធ្លាប់មានពីមុន​មកនៅក្នុងប្រវត្តិសាស្ត្រ។

រដ្ឋាភិបាលក្រុងអាថែន បានតាមយ៉ាងប្រកៀកពីស្ថានភាពនៅក្នុងប្រទេសតួកគីចាប់តាំងពីការប៉ុនប៉ងធ្វើរដ្ឋប្រហារនេះ បានកើត​ឡើងនៅល្ងាចថ្ងៃសុក្រ។ រដ្ឋមន្ត្រីគណៈរដ្ឋមន្ត្រីនិងមន្ត្រីយោធាជាន់ខ្ពស់របស់ប្រទេសក្រិក បានប្រារព្ធកិច្ចប្រជុំបន្ទាន់ ដើម្បីវាយ​តម្លៃការអភិវឌ្ឍនៅក្នុងប្រទេសតួកគី។

ក្រសួងការពារជាតិប្រទេសក្រិចបាននិយាយថា ឧទ្ធម្ភាគចក្រយោធាតួកគី បានចុះចតនៅប្រទេសក្រិច ហើយមនុស្សចំនួន ៨នាក់នៅលើយន្តហោះនេះ បានស្នើសុំសិទ្ធិជ្រកកោនផ្នែកនយោបាយ។ កាលពីព្រឹកថ្ងៃសៅរ៍នេះ ទីភ្នាក់ងាររបស់រដ្ឋ Anadolu រាយការណ៍ថា ចំនួនអ្នកស្លាប់នៅក្នុងការប៉ុនប៉ងធ្វើរដ្ឋប្រហារយោធា បានកើនឡើងដល់ ៩០នាក់ រួមទាំងប៉ូលិស ៤១នាក់ និងរបួស ១.១៥៤នាក់។

របាយការណ៍នេះបាននិយាយថា ទាហានដែលគ្មានអាវុធយ៉ាងហោចណាស់ ៧០០នាក់ នៅទីស្នាក់ការកណ្តាលយោធា​ប្រទេសតួកគី បានចុះចាញ់ ហើយខណៈពេលនេះ យោធាដែលបានចាប់ខ្លួនកើនឡើងដល់ ៣.០០០នាក់ ហើយគិតមកដល់​ពេលនេះ តួកគីធ្លាប់ជួបរដ្ឋប្រហារចំនួន៥លើកមកហើយ ចាប់តាំងពីឆ្នាំ១៩៦០, ឆ្នាំ១៩៧១, ឆ្នាំ១៩៨០, ឆ្នាំ១៩៩៧​ និង​ឆ្នាំ២០១៦នេះ៕