កូរ៉េ: តាមរបាយការណ៍ នៅថ្ងៃច័ន្ទនេះ បាននិយាយថា រដ្ឋមន្រ្តីការបរទេសចិន លោក Wang Yi បានរិះគន់លើកូរ៉េខាងត្បូង ចំពោះការដាក់ពង្រាយប្រព័ន្ធប្រឆាំងមីស៊ីលកម្រិតខ្ពស់ការពារជាតិ (THAAD) របស់អាមេរិក ដើម្បីទប់ទល់នឹងការគំរាមកំហែងពីកូរ៉េខាងជើងនោះថា វាជាការប៉ះពាល់ដល់ការជឿទុកចិត្តគ្នា ទៅវិញទៅមករបស់ពួកគេ។ នេះបើយោងតាមរយ: សារព័ត៌មានចិនសិង្ហបុរី ចេញផ្សាយនៅថ្ងៃទី២៥ ខែកក្កដា ឆ្នាំ២០១៦។

សេចក្តីប្រកាសនេះ បានបន្ថែមថា បន្ទាប់ពីកិច្ចព្រមព្រៀងរបស់កូរ៉េខាងត្បូង និងអាមេរិកនៅក្នុងខែនេះ ថាពួកគេនឹងដាក់ពង្រាយប្រព័ន្ធប្រឆាំងមីស៊ីល (THAAD) នោះ បានធ្វើឲ្យរដ្ឋាភិបាលក្រុងប៉េកាំង ដកសេចក្ដីជឿទុកចិត្តរួចទៅហើយថា វាអាចនឹងបាត់បង់ស្ថិរភាពសន្តិសុខ ក្នុងតំបន់នេះ។

ការសម្រេចចិត្តដើម្បីដាក់ពង្រាយ THAAD នេះ គឺជាការផ្លាស់ប្តូរថ្មីបំផុត ដែលធ្វើឲ្យកាន់តែមានភាពតានតឹង ជាមួយកូរ៉េខាងជើង ខណ:ដែលចិន និងរុស្ស៊ីបានប្រឆាំងនឹងការដាក់ពង្រាយនេះផងដែរ។

លោក Wang បាននិយាយថា ” នេះជាការផ្លាស់ប្តូរថ្មីដោយភាគីកូរ៉េខាងត្បូង បានធ្វើឲ្យប៉ះពាល់ ដល់មូលដ្ឋានគ្រឹះនៃការជឿទុកចិត្តគ្នាទៅវិញទៅមករវាងប្រទេសទាំងពីរ” ៕