វ៉ាស៊ីនតោនៈមហាសេដ្ឋីប្រចាំទីក្រុងញូយ៉ក និងជាបេក្ខជនប្រធានាធិបតីនាំមុខកន្លងមក សម្រាប់គណបក្សសាធារណរដ្ឋលោក ដូណាល់ ត្រាំ (Donald Trump) បានយកឈ្នះការប្រកួតប្រជែង ក្នុងតំបន់របស់ខ្លួន គឺទីក្រុងញូយ៉ក ដូចជាលោកស្រី ហ៊ីលឡារី គ្លីនតុន ដែលមកពីគណបក្សប្រជាធិបតេយ្យ ផងដែរ។ នេះបើតាមការចេញផ្សាយ ដោយទីភ្នាក់ងារព័ត៌មានចិន ស៊ិនហួ នាព្រឹកថ្ងៃពុធ ទី២០ ខែមេសា ឆ្នាំ២០១៦។

លោក ត្រាំ នៅក្នុងការបោះឆ្នោតផ្តល់ការគាំទ្រ នៅថ្ងៃអង្គារ ដែលត្រូវបានបិទបញ្ចប់នាវេលាម៉ោង ៩និង០០នាទីយប់នោះ ត្រូវបានគេមើលឃើញថាលោកទទួលបានសំឡេងគាំទ្រ រហូតដល់ទៅជាង ៦០ភាគរយ ឯណោះ ដែលវ៉ាដាច់បេក្ខជននានាក្នុងបក្សដូចគ្នា ឆ្ងាយតែម្តង។

គួរបញ្ជាក់ថាលទ្ធផល ខាងលើនេះ គឺស្របតាមការរំពឹងទុករបស់ក្រុមអ្នកវិភាគ ចំពោះការប្រកួតនៅកន្លែងដែលលោកត្រាំ មានប្រជាប្រិយខ្លាំងស្រាប់ទៅហើយនោះ៕