អូស្ត្រាលី: ប្រព័ន្ធផ្សព្វផ្សាយក្នុងស្រុក នៅថ្ងៃច័ន្ទនេះ បានឲ្យដឹងថា នាយករដ្ឋមន្រ្តីអូស្រ្តាលីលោក Malcolm Turnbull មិនយល់ស្របតាមក្រសួងកិច្ចការបរទេស និងពាណិជ្ជកម្ម (DFAT) ដើម្បីគាំទ្រអតីតនាយករដ្ឋ មន្ត្រីលោក Kevin Rudd ក្លាយជាអគ្គលេខាធិការ UN នាពេលខាងមុខនោះទេ ។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី១ ខែសីហា ឆ្នាំ២០១៦។

កាលពីថ្ងៃសុក្រលោក Turnbull បាននិយាយថា រដ្ឋាភិបាលរបស់លោក មិនផ្ដល់ការគាំទ្រ លោក Kevin Rudd សម្រាប់តំណែងជាអគ្គលេខាធិការ UN ខាងមុខនោះទេ ប៉ុន្តែការដាក់ស្នើឈ្មោះរបស់លោកពី DFAT បានបង្ហាញដល់គណបក្សនៅឯកិច្ចប្រជុំគណ:រដ្ឋមន្ត្រី កាលពីថ្ងៃព្រហស្បតិ៍ បានឲ្យដឹងថា អតីតមេដឹកនាំ រូបនេះ មានលក្ខណ:ល្អច្រើនបើធៀបជាមួយបេក្ខជនផ្សេងទៀត សម្រាប់ការតែងតាំងជាអគ្គលេខាធិការ UN នាពេលខាងមុខ។

បើយោងតាមប្រព័ន្ធផ្សព្វផ្សាយ News Corp បានឲ្យដឹងថា ការដាក់ស្នើនេះ ត្រូវធ្វើទ្បើងដោយលោកស្រី Frances Adamson ប្រធាននាយកដ្ឋានថ្មី និងត្រូវបានគាំទ្រដោយចំនួននៃអ្នកការទូតអូស្រ្តាលីឈានមុខគេ ទោះយ៉ាងណាលោក Turnbull បានបដិសេធសំណើនោះ ដោយនិយាយថា «ខ្លួនមិនសាកសមនោះទេ» សម្រាប់តួនាទីកិត្យានុភាពនេះ៕