រុស្ស៊ី: រដ្ឋមន្រ្តីក្រសួងសេដ្ឋកិច្ចរបស់រុស្ស៊ីលោក Alexei Ulyukayev ត្រូវបាន​គេដកស្រង់សម្តីដោយទីភ្នាក់ងារសារព័ត៌មាន RIA Novosti បាននិយាយនៅថ្ងៃពុធនេះថា​ ទណ្ឌកម្មម្ហូបអាហារប្រឆាំងនឹងប្រទេសតួកគី អាចនឹងត្រូវបានលើកលែង នៅត្រឹមចុងឆ្នាំ២០១៦នេះ។ នេះបើយោងតាមការចញផ្សាយដោយសារព័ត៌មានចិនស៊ិនហួ នៅថ្ងៃទី១០ សីហា ឆ្នាំ២០១៦។

លោក Ulyukayev បានថ្លែងថា «យើងបានព្រមព្រៀងគ្នាថា នេះគឺជាដំណើរបន្តិចម្តងៗ ដោយ​បានកត់​សម្គាល់​ថា បញ្ហាដែលនៅសេសសល់នៅលើផលិតផលសាច់មាន់និងទឹកដោះគោ នឹងត្រូវបាន​ដោះ​ស្រាយដោយទ្វេភាគី»។

លោកបានបន្ថែមថា យើងត្រូវការវេលាបន្តិចទៀត ដើម្បីធ្វើឱ្យប្រាកដថា គុណភាពសម្រាប់ការផ្គត់ផ្គង់នៃ​ផលិត​ផលតួកគី គឺតម្រូវការតាមរយ: Rosselkhoznadzor ជាទីភ្នាក់ងារអង្គការឃ្លាំមើល​កសិកម្មរបស់​ប្រទេសរុស្ស៊ី។

សូមបញ្ជាក់ថា ប្រទេសរុស្ស៊ី បានដាក់វិធានការមួយចំនួនយ៉ាងតឹងរ៉ឹង រួមបញ្ចូលទាំងទណ្ឌកម្មចំណីអាហារ​ទៅលើ​ប្រទេស​តួកគី ក្នុងការឆ្លើយតបទៅនឹងការបាញ់ទម្លាក់យន្តហោះចម្បាំងរុស្ស៊ី ដោយយន្តហោះចម្បាំង​ប្រទេសតួកគី កាលពីខែវិច្ឆិកា ឆ្នាំ២០១៥ នៅក្នុងប្រទេសស៊ីរី៕