ហ្វីលីពីន: មន្ត្រីរដ្ឋាភិបាល បានឲ្យដឹងកាលពីថ្ងៃអាទិត្យថា អត្រាឧក្រិដ្ឋកម្មនៅហ្វីលីពីន បានធ្លាក់ចុះ ៩,៨ ភាគរយពីមួយឆ្នាំ ទៅមួយឆ្នាំក្នុងខែកក្កដា បន្ទាប់ពីប្រធានាធិបតី លោក Rodrigo Duterte តំណែងបានមួយខែ ចំនួនជនសង្ស័យគ្រឿងញៀន ដែលត្រូវបានបាញ់សម្លាប់ ៥៩២ នាក់។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី១៥ ខែសីហា ឆ្នាំ២០១៦។

ការិយាល័យលេខាធិការទំនាក់ទំនងរបស់ប្រធានាធិបតី លោក Martin Andanar បាននិយាយថា ប៉ូលិសហ្វីលីពីនបានកត់ត្រាអត្រាបទល្មើសចំនួន ៥០.៨១៧ ករណីក្នុងខែកក្កដា មានការធ្លាក់ចុះ បើធៀបនឹងខែដូចកាលពីឆ្នាំមុន ៥៦.៣៣៩ ករណី ខណ:ដែលលោក Duterte បានប្តេជ្ញាថា នឹងដោះស្រាយបទឧក្រិដ្ឋ ក្នុងរយ:ពេលបីខែដំបូង ទៅប្រាំមួយខែ នៃរដ្ឋបាលរបស់លោក។

លោក Andanar បានឲ្យដឹងថា អត្រាបទល្មើសនេះ បានធ្លាក់ចុះផងដែរ រហូតដល់ ៣១ ភាគរយ ដោយក្នុងខែកក្កដាមានចំនួន ១១.៨០០ ករណី បើធៀបទៅនឹងខែដដែរឆ្នាំមុន ១៧.១០៥ ករណី។ លោក បានបន្តថា ការធ្លាក់ចុះនៃបទល្មើសនេះ ជាសញ្ញាយ៉ាងសំខាន់បង្ហាញឲ្យឃើញថា មានសកម្មភាពខ្លាំងក្លា និងឆាប់រហ័សរបស់រដ្ឋាភិបាល លោក Duterte ។

គួរបញ្ជាក់ដែរថា ក្នុងយុទ្ធនាការប្រឆាំងនឹងគ្រឿងញៀនខុសច្បាប់ លោក Andanar បានលើកឡើងផងដែរ ថា អាជ្ញាធរធ្វើប្រតិបត្ដិការបង្រ្កាបបានចំនួន ៥.៤២២ ករណី ចាប់តាំងពីថ្ងៃទី១ ខែកក្កដា ដល់ថ្ងៃទី១៤ ខែ សីហា ជាលទ្ធផលជនសង្ស័យគ្រឿងញៀន ៥៩២នាក់ ត្រូវបាញ់សម្លាប់ និង ៨.៣៣២ នាក់ទៀត ត្រូវចាប់ឃុំខ្លួន ខណ:អ្នកប្រើប្រាស់ និងអ្នកជួញដូរគ្រឿងញៀនសរុប ៥៥៤.២៤៣ នាក់ បានសុំចុះចាញ់ និងចូលខ្លួនមកសារភាព៕