ថៃ: ប្រធានអាជ្ញាធរទេសចរណ៍របស់ខ្លួន បានបញ្ជាក់អះអាងនៅថ្ងៃច័ន្ទនេះថា ប្រទេសថៃអាចនឹងបាត់បង់ភ្ញៀវទេសចរបរទេសរហូតដល់ទៅចំនួន ២០០.០០០នាក់ ដែលគិតជាទឹកប្រាក់ចំនួន ២៩៣លានដុល្លារអាមេរិកបានមកពីប្រាក់ចំណូលវិស័យទេសចរណ៍នៅក្នុងឆ្នាំនេះ បន្ទាប់ពីមានករណីបំផ្ទុះគ្រាប់បែកសម្លាប់មនុស្សនៅក្នុងក្រុងទេសចរណ៍សប្តាហ៍មុន។

បើយោងតាមការចេញផ្សាយដោយសារព័ត៌មាន Channel News Asia នៅរសៀលថ្ងៃទី១៥ សីហា ឆ្នាំ២០១៦នេះ បានឲ្យដឹងថា រលកនៃការវាយប្រហារនៅតាមទីកន្លែងមួយចំនួន រួមទាំងតំបន់មាត់សមុទ្រហួហ៊ីននិងកោះភូកេតគឺជាបញ្ហាប្រឈមធំបំផុតដល់ឧស្សាហកម្មដែលបានជម្នះច្រើនជាងមួយទសវត្សរ៍ នៃអស្ថេរភាពនិងងើបឡើងវិញ ក្រោយពីមានអំពើហិង្សារយ:ពេលប៉ុន្មានឆ្នាំចុងក្រោយនេះទេ។

លោក Yuthasak Supasorn អភិបាលនៃអាជ្ញាធរទេសចរណ៍រដ្ឋថៃបាននិយាយថា ការវាយប្រហារនោះអាចបណ្តាលពីការខាតបង់រយ:ពេលវែងនៅក្នុងលក្ខខណ្ឌនៃការមកដល់របស់ភ្ញៀវទេសចរណ៍និងប្រាក់ចំណូលភាគច្រើន មកពីបណ្តាប្រទេសអាស៊ីផ្សេងទៀត។

លោកបាននិយាយនៅក្នុងសេចក្តីថ្លែងការណ៍មួយថា «នៅចុងឆ្នាំនេះ អាចមានប្រមាណ ១០០.០០០ ដល់ ២០០.០០០នាក់ លុបចោលការធ្វើដំណើរ»។ «ដែលពួកគេនឹងចំណាយអស់ប្រាក់ប្រមាណ ៥,០៨ពាន់លានបាត ស្មើនឹង ១៤៦លានដុល្លារអាមេរិក ដល់ ១០.១៦ពាន់លានបាត ស្មើនឹង ២៩៣លានដុល្លារ អាមេរិក»។

សូមជម្រាបថា ប្រទេសអាស៊ីអាគ្នេយ៍មួយនេះត្រូវបានគេរំពឹងថា នឹងមានកំណត់ត្រាភ្ញៀវទេសចរចំនួន ៣២លាននាក់នៅឆ្នាំ២០១៦ ដែលមានការរំពឹងថា មានចំណូល ២,៤១ពាន់ពាន់លានបាត ស្មើនឹង ៧០ ពាន់លានដុល្លារអាមេរិក៕