ភ្នំពេញ: ការប្រឡងសញ្ញាបត្រមធ្យមសិក្សាទុតិយភូមិហៅថា បាក់ឌុប ឆ្នាំសិក្សា២០១៥-២០១៦ បានដំណើរការអស់រយ:ពេលមួយថ្ងៃកន្លះ គេសង្កេតឃើញជាទូទៅបានដំណើរការដោយរលូនល្អ ទោះបីវាមានបញ្ហាខ្លះៗក៏ដោយ។

តាមសេចក្តីរាយការណ៍ថា បេក្ខជនប្រឡង ដែលមានបញ្ហាសុខភាពខ្យល់គរ វិលមុខជាង១០នាក់កាលពីម្សិលមិញនោះ បានវិលមកចូលប្រឡងជាធម្មតាវិញ។ ចំពោះមុខវិជ្ជា ដែលអាក់ខានប្រឡងនោះ នឹងត្រូវប្រឡងសងលើមុខវិជ្ជានោះវិញ។

ប៉ុន្តែទោះជាយ៉ាងណា បើតាមក្រសួងអប់រំ បន្តឲ្យដឹងថា មានបេក្ខជនមានបញ្ហាសុខភាពក្នុងពេលប្រឡងអាចបន្តប្រឡងបានឡើងវិញ ក្រោយការជួយសង្គ្រោះ លើកលែងតែ១ករណី នៅខេត្តកំពង់ធំប៉ុណ្ណោះ។ ក្រសួងសង្កេតឃើញថា បេក្ខជនបានគោរពបទបញ្ញត្តិនៃការប្រឡងយ៉ាងល្អ មានការជឿជាក់ និងធ្វើកិច្ចការបានច្រើន ពោលគឺពុំមានឧបទ្ទវហេតុអ្វីកើតឡើងគួរឲ្យកត់សម្គាល់ឡើយ។

គួរជម្រាបផងដែរថា ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា ឬបាក់ឌុប ប្រព្រឹត្តទៅរយ:ពេល២ថ្ងៃ គឺចាប់ពីថ្ងៃទី២២ ដល់ថ្ងៃទី២៣ ខែសីហា ឆ្នាំ២០១៦ ដែលមានថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម រួមមានបេក្ខជនប្រឡងសរុបចំនួន ៩៣៧៥២នាក់ មានមណ្ឌលប្រឡងសរុបចំនួន១៥៧ ចែកចេញជា ៣៧៨២បន្ទប់ នៅរាជធានីខេត្តទាំង២៥ ទូទាំងប្រទេស។

ចំណែកលទ្ធផលនៃការប្រឡង នឹងប្រកាសជូននៅរសៀលថ្ងៃទី១៣ ខែកញ្ញា ឆ្នាំ២០១៦ ចំពោះមណ្ឌលប្រឡងក្នុងរាជធានីភ្នំពេញ និងខេត្តកណ្ដាល។ ដោយឡែក បណ្ដាខេត្តផ្សេងទៀត នឹងប្រកាសជូននៅព្រឹកថ្ងៃទី១៤ ខែកញ្ញា ឆ្នាំ២០១៦៕