អាមេរិក៖ គ្រាប់រ៉ូកែត SpaceX របស់ទីភ្នាក់ងារអវកាស​ NASA ត្រូវបានផ្ទុះឆេះខណៈពេលត្រៀមបាញ់​បង្ហោះពី​​មូលដ្ឋាន Cape Canaveral ប៉ុន្តែសំណាងល្អ ព្រោះមិនបណ្ដាលឲ្យមានមនុស្សស្លាប់ និង​របួស តែវាបានបំផ្លាញ់ផ្កាយរណបរបស់ Facebook។

សារព័ត៌មាន CNN បានចេញផ្សាយដោយដកស្រង់សំដីរបស់លោក Elon Musk នាយកប្រតិបត្តិ SpaceX ថា គ្រាប់រ៉ូកែតត្រូវបាន​ផ្ទុះឆេះឡើងដោយមិនដឹងមូលហេតុ ខណៈពេលត្រៀមបាញ់​បង្ហោះ ដោយរ៉ូកែតមួយនេះ បាញ់បង្ហោះឡើងដើម្ប​បញ្ជូនផ្កាយរណបរបស់ Facebook ក្នុងគោលដៅនាំយក​អ៊ីនធើណែតទៅចែកចាយនៅតំបន់​អាហ្វ្រិក, មជ្ឈឹមបូព៌ា និង​អឺរ៉ុប។

Facebook បានសហការជាមួយនឹងក្រុមហ៊ុនបារាំង Eutelsat Communications ដើម្បីបង្កើតផ្កាយរណប​មួយដែលមានឈ្មោះថា Amos 6 ក្រោមកិច្ចសហការផ្ដល់ជំនួយបន្ថែមទៅលើបច្ចេកទេស ពីក្រុមហុនអ៊ីស្រាអ៊ែល Spacecom។

លោក Mark Zuckerberg នាយកប្រតិបត្តិ Facebook បានថ្លែងនៅលើបណ្ដាញសង្គម Facebook ថា លោកពិតជាសោកស្ដាយខ្លាំងណាស់នៅពេលទទួលបានដំណឹងដ៏អាក្រក់មួយនេះ ប៉ុន្តែលោកមិនបោះបង់​គម្រោងមួយនេះឡើយ។

គួរបញ្ជាក់ផងដែរថា រ៉ូកែតនេះ បានផ្ទុះឆេះឡើងនៅម៉ោងប្រមាណ ៩:០៧នាទីព្រឹក និងនៅថេរវេលា៤នាទីចុងក្រោយនៃការត្រៀមបាញ់បង្ហោះ៕