ចិន: ក្រសួងការបរទេសចិន បានឲ្យដឹងនៅក្នុងសេចក្តីថ្លែងការណ៍មួយ ដែលបានបង្ហោះនៅលើគេហទំព័រ របស់ខ្លួននៅថ្ងៃសុក្រនេះថា នាយករដ្ឋមន្ត្រីចិនលោក Li Keqiang បានប្រាប់ប្រធានាធិបតីហ្វីលីពីន លោក Rodrigo Duterte ថា លោកសង្ឃឹមថា ប្រទេសទាំងពីរអាចធ្វើការរួមគ្នា ដើម្បីនាំយកមកនូវចំណងទាក់ទង ទ្វេភាគីត្រឡប់ទៅធម្មតាវិញ។ នេះបើយោងតាមរយ: សារព័ត៌មានចិនសិង្ហបុរី ចេញផ្សាយនៅថ្ងៃទី៩ ខែកញ្ញា ឆ្នាំ២០១៦។

មេដឹកនាំទាំងពីរ បានជួបគ្នានៅខាងក្រៅកិច្ចប្រជុំកំពូលថ្នាក់តំបន់មួយ នៅក្នុងរដ្ឋធានីវៀងចន្ទប្រទេសឡាវ កាលពីថ្ងៃព្រហស្បតិ៍ ចំពេលនៃភាពតានតឹងរវាងចិន និងហ្វីលីពីននៅលើដែនទឹក ដែលមានជម្លោះ នៅក្នុងសមុទ្រចិនខាងត្បូង។

សេចក្តីថ្លែងការណ៍នេះ បានឲ្យដឹងថា លោក Li បាននិយាយថា លោកសង្ឃឹមថា ទំនាក់ទំនងទ្វេភាគី អាចនឹងល្អប្រសើរ ប្រកបដោយស្ថិរភាព និងការអភិវឌ្ឍ។

ក្នុងនោះដែរ លោក Duterte បាននិយាយដោយកត់សម្គាល់ថា ការថ្លែងរបស់លោក Li នឹងជួយកែលម្អទំនាក់ទំនងជាមួយប្រទេសចិន ដែលនេះជាអ្វីដែលលោកកំពុងតែត្រូវការផងដែរ៕