ឥណ្ឌា: បើតាមក្រុមមន្ត្រីនៅថ្ងៃច័ន្ទនេះ បាននិយាយថា ទឹកជំនន់នៅរដ្ឋ Assam ភាគខាងត្បូងប្រទេសឥណ្ឌា បានរងផលប៉ះពាល់ដល់មនុស្សចំនួនជិត ១០០.០០០នាក់ និងបានសម្លាប់មនុស្សចំនួន ២នាក់កាលពីថ្ងៃអាទិ្យ។ នេះបើយោងតាមរយ: សារព័ត៌មានចិនស៊ិនហួរ ចេញផ្សាយនៅថ្ងៃទី២៥ ខែមេសា ឆ្នាំ២០១៦។

ក្នុងនោះដែរ មនុស្សម្នាក់ត្រូវបានគេដឹងថា បានស្លាប់ដោយសារព្យុះព្រិលនៅស្រុក Tinsukia និងម្នាក់ទៀតត្រូវបានខ្យល់បក់បោកទៅឆ្ងាយ នេះបើតាមការឲ្យដឹងពីក្រុមមន្ត្រី។

គួរបញ្ជាក់ផងដែរ គ្រោះទឹកជំនន់នេះ ក៏បានរងការបំផ្លិចបំផ្លាញទៅលើផ្ទៃដីដាំដំណាំទំហំ ២.០០០ ហិកតាផងដែរ។

បើតាមប្រព័ន្ធផ្សព្វផ្សាយផ្លូវការរបស់ប្រទេសឥណ្ឌា បានឲ្យដឹងថា ខណ:ពេលនេះ ប្រធានរដ្ឋលេខាធិការកំពុងត្រួតពិនិត្យលើស្ថានភាពទឹកជំនន់ នៅក្នុងទីក្រុង Guwahati និងបានណែនាំឲ្យស្នងការចុះទៅជួយដល់ប្រជាជន ដែលរងផលប៉ះពាល់ដោយសារគ្រោះទឹកជំនន់៕