ភ្នំពេញ: យោងតាមដីកាកោះ ចេញកាលពីថ្ងៃទី២២ ខែមេសា ឆ្នាំ២០១៦ ចេញដោយលោក វង្ស ប៊ុនវិសុទ្ធ ព្រះរាជអាជ្ញារង អមសាលាដំបូងរាជធានីភ្នំពេញ បានបញ្ជាឲ្យលោក សម រង្ស៊ី ជាប្រធានគណបក្សសង្គ្រោះជាតិ ចូលបង្ហាញខ្លួន នៅសវនាការ នាថ្ងៃទី២៨ ខែកក្កដា ឆ្នាំ ២០១៦ វេលាម៉ោង០៨:៣០នាទីព្រឹក ខាងមុខដ៏ខ្លីនេះ នៅសាលសវនាការទី៣ ជាន់ទី១ នៃសាលាដំបូងរាជធានីភ្នំពេញ។

សូមបញ្ជាក់ថា ការកោះហៅ លោកសម រង្ស៊ី ចូលសវនាការ នាពេលខាងមុខនេះ គឺពាក់ព័ន្ធនឹងបទល្មើស បរិហារកេរ្តិ៍ជាសាធារណ: បានប្រព្រឹត្តិនៅលើ គណនីហ្វេសប៊ុក ឈ្មោះ Sam Rainsy កាលពីថ្ងៃទី១៧ ខែវិច្ឆិកា ឆ្នាំ២០១៥ តាមមាត្រា៣០៥ នៃក្រមព្រហ្មទណ្ឌ នៃព្រះរាជាណាចក្រកម្ពុជា។

គួររំលឹកថា ដើមចមនៃសំណុំរឿងនេះ គឺកើតចេញកាលពីថ្ងៃទី១៧ ខែវិច្ឆិកា ឆ្នាំ២០១៥ វេលាម៉ោង០៦ និង៥៧នាទី ព្រឹកកន្លងទៅ លើទំព័រហ្វេសប៊ុក ឈ្មោះ Sam Rainsy ( សម រង្ស៊ី ) បានផ្សព្វផ្សាយជាសាធារណ: នូវខ្លឹមសារថា៖ យើងចងចាំថា របបកើតថ្ងៃ ៧ មករា ១៩៧៩ បានឲ្យតុលាការរបស់គេ កាត់ទោសប្រហារជីវិត សម្តេចព្រះ នរោត្តម សីហនុ ដោយចោទព្រះអង្គថា ជាជនក្បត់ជាតិ ដោយភ្ជាប់ជាមួយ នឹង វីដេអូព្រះរាជបន្ទូល សម្តេចព្រះនរោត្តម សីហនុ។

បន្ទាប់មកលោក គី តិច ជាមេធាវី តំណាងសម្តេចពញាចក្រី ហេង សំរិន ក៏បានដាក់ពាក្យបណ្ដឹង សុំប្តឹងលោក សម រង្ស៊ី ពីបទបរិហារកេរ្តិ៍ជាសាធារណ: ដោយលើកឡើងថា៖ ខ្លឹមសារដែលឈ្មោះ សម រង្ស៊ី ផ្សព្វផ្សាយនេះ ពុំបានឆ្លុះបញ្ចាំងពីការពិតទេ ដោយគ្មានឯកសារណាមួយ  ជាភស្តុតាងបញ្ជាក់ពី ការកាត់ទោសលើ ព្រះនរោត្តម សីហនុ ឡើយ៕