ភ្នំពេញៈ រដ្ឋាករទឹកស្វយ័តក្រុងភ្នំពេញ នឹងធ្វើការផ្អាកការផ្គត់ផ្គង់ទឹកស្អាតនៅយប់ថ្ងៃសុក្រ ទី១៤ ខែតុលា ឆ្នាំ២០១៦ រយៈពេល៥ម៉ោង ដើម្បីឲ្យក្រុមការងារបច្ចេកទេសធ្វើការស្រាវជ្រាវរកទឹកបាត់បង់ សំដៅកាត់បន្ថយការបាត់បង់ទឹកឲ្យនៅកម្រិតទាប។ ការផ្អាកការផ្គត់ផ្គង់ទឹកនេះ នឹងត្រូវធ្វើឡើងនៅតំបន់មួយចំនួនក្នុងសង្កាត់ស្រះចក និងសង្កាត់វត្តភ្នំ ខណ្ឌដូនពេញ រាជធានីភ្នំពេញ។

រដ្ឋាករទឹកក្រុងភ្នំពេញ ជូនដំណឹងមុននេះប៉ុន្មាននាទីថា «ក្រុមការងារយើងខ្ញុំ នឹងចុះអនុវត្តធ្វើការស្រាវជ្រាវរកទឹកបាត់បង់ ក្នុងគោលបំណងកាត់បន្ថយទឹកបាត់បង់ឲ្យនៅកម្រិតទាប ក្នុងផ្ទៃសេវាទាំងមូល គឺសំដៅលើការបង្កើនសេវាផ្គត់ផ្គង់ទឹកឲ្យបានកាន់តែប្រសើរឡើង ក្នុងសង្កាត់ស្រះចក និងសង្កាត់វត្តភ្នំ ខណ្ឌដូនពេញ រាជធានីភ្នំពេញ ហើយនឹងធ្វើការផ្អាកផ្គត់ផ្គង់ទឹកស្អាត នៅយប់ថ្ងៃសុក្រ ទី១៤ ខែតុលា ឆ្នាំ២០១៦ ចាប់ពីម៉ោង១២៖០០នាទីយប់ ដល់ម៉ោង៥៖០០នាទីព្រឹក»។

ជាមួយគ្នា រដ្ឋាករទឹក ក៏អំពាវនាវឲ្យប្រជាពលរដ្ឋរស់នៅតំបន់ខាងលើ មេត្តាត្រៀមបម្រុងទឹកទុកសម្រាប់ប្រើប្រាស់ ក្នុងអំឡុងពេលដែលក្រុមការងារចុះអនុវត្តការងារនេះផងដែរ៕