បន្ទាយមានជ័យ: ទឹកភ្នែកឪពុកកុមារីរងគ្រោះ ដែលបានហូរអស់រយ:ពេល៤ខែហើយនោះ នៅពេលនេះចាប់ផ្ដើមឃើញពន្លឺយុត្តិធម៌ហើយ បន្ទាប់ពីបែកធ្លាយប៉ូលិសក្រុងប៉ោយប៉ែត ផ្អឹបសំណុំរឿងរំលោភក្មេងស្រីអាយុ៤ឆ្នាំ ទុកចោលមិនចាត់ការ។ ពន្លឺយុត្តិធម៌ ដែលទើបតែចាប់ផ្ដើមនេះ បន្ទាប់ពីតុលាការចាប់បានជនសង្ស័យ ហើយក្រសួងយុត្តិធម៌ថា នឹងចាត់វិធានការចំពោះមន្ត្រីនគរបាលយុត្តិធម៌ក្រុងប៉ោយប៉ែត ដែលផ្អឹបសំណុំរឿងមិនចាត់ការ។

កាលពី៤ខែមុន ឪពុកកុមារីរងគ្រោះឈ្មោះ លាភ លីតេក អាយុ៤០ឆ្នាំ រស់នៅផ្ទះជួលក្នុងភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានដាក់ពាក្យប្ដឹងសាច់ថ្លៃប្រពន្ធរបស់គាត់ឈ្មោះ ថុង មន ហៅ ពៅ អាយុ៣២ឆ្នាំ ករណីរំលោភសេពសន្ថវ:លើកូនស្រីអាយុ៤ឆ្នាំ។ ទោះជាយ៉ាងណា យុត្តិធម៌ចំពោះកុមារីរងគ្រោះហាក់ស្ងាត់ឈឹងគ្មានពន្លឺសូម្បីបន្តិច។ ប៉ុន្តែរហូតមកទល់ពាក់កណ្ដាលខែវិច្ឆិកា ឆ្នាំ២០១៦នេះ ពន្លឺយុត្តិធម៌បានមើលឃើញបណ្ដើរៗវិញ បន្ទាប់ពីឪពុកកុមារីរងគ្រោះទម្លាយរឿងនេះដល់អ្នកសារព័ត៌មាន ហើយត្រូវក្រសួងយុត្តិធម៌ មានចំណាត់ការភ្លាមៗ។

លោក គឹម សន្តិភាព អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌ ឲ្យដឹងនៅរសៀលថ្ងៃទី១៧ ខែវិច្ឆិកានេះថា ករណីនេះ មន្ត្រីប៉ូលិសក្រុងប៉ោយប៉ែត ជាអ្នកទទួលពាក្យបណ្ដឹង និងបើកការស៊ើបអង្កេតផ្ទាល់ ដោយមិនបានជូនដំណឹង និងរាយការណ៍មកស្ថាប័នអយ្យការពីចំណាត់ការណាមួយនោះទ្បើយ។ លោកបន្ថែមថា លុះបែកព័ត៌មាននេះ ទើបអធិការក្រុងប៉ោយប៉ែត បញ្ជូនរឿងទៅស្នងការដ្ឋាននគរបាលខេត្តនាពេលថ្មីៗនេះ។

លោក គឹម សន្តិភាព បញ្ជាក់ ៖ «ក្រោយទទួលបានព័ត៌មាននេះភ្លាម លោកព្រះរាជអាជ្ញា បានចេញបព្ជាឲ្យការិយាល័យព្រហ្មទណ្ឌកម្រិតធ្ងន់ តាមស្វែងរកជនសង្ស័យមកចាត់ការតាមច្បាប់ ដោយរហូតមកដល់ពេលនេះ ជនសង្ស័យឈ្មោះ ថុង មន ហៅ ពៅ កំពុងត្រូវបាននាំខ្លួនពីខេត្តកំពង់ចាម មកកាន់ខេត្តបន្ទាយមានជ័យ ដើម្បីមានចំណាត់ការបន្ត រីឯនគរបាលយុត្តិធម៌ ដែលមានចេតនាផ្អឹបរឿងនេះទុក នឹងមានវិធានការបន្ត»។

ជុំវិញករណីក្រសួងយុត្តិធម៌ ព្រមានចាត់ការមន្ត្រីនគរបាលក្រុងប៉ោយប៉ែត ស្នងការនគរបាលខេត្តបន្ទាយមានជ័យ លោកឧត្តមសេនីយ៍ទោ អាត់ ខែម ប្រាប់ Post News នៅរសៀលថ្ងៃទី១៧ ខែវិច្ឆិកានេះថា «មន្ត្រីនគរបាលយុត្តិធម៌មានសិទ្ធិបើកការស៊ើបអង្កេត និងស្រាវជ្រាវលើសំណុំរឿងនេះ… រឿងក្រសួងយុត្តិធម៌ថា នឹងចាត់ការនគរបាលក្រុងប៉ោយប៉ែត ជារឿងរបស់ក្រសួងយុត្តិធម៌»។

គួរជម្រាបថា កាលពីអំឡុងខែសីហា ឆ្នាំ២០១៦ កុមារីឈ្មោះ ត.ស.គ អាយុ៤ឆ្នាំ កូនរបស់លោក លាភ លីតេក ត្រូវបានជនសង្ស័យឈ្មោះ ថុង មន ហៅ ពៅ អាយុ៣២ឆ្នាំ ជាពូ(សាច់ថ្លៃខាងម្ដាយ) ធ្វើសកម្មភាពចាប់រំលោភរហូតបានសម្រេច។ ក្រោយមក ឪពុកកុមារីរងគ្រោះបានទៅដាក់ពាក្យបណ្ដឹង ប៉ុន្តែពន្លឺយុត្តិធម៌គ្មានពន្លឺចាំបាត់ៗអស់រយ:៤ខែ ទើបសម្រេចចិត្តទម្លាយប្រាប់អ្នកសារព័ត៌មាន។

លុះនៅថ្ងៃទី១៧ ខែវិច្ឆិកា ឆ្នាំ២០១៦ លោក សុក កែវបណ្ឌិត ព្រះរាជអាជ្ញារង នៃអយ្យការអមសាលាដំបូងខេត្តបន្ទាយមានជ័យ បានចេញដីកាបញ្ជាឲ្យចូលខ្លួន ដោយឲ្យឈ្មោះ ថុង មន ហៅ ពៅ ភេទប្រុស អាយុ៣២ឆ្នាំ ស្រុកកំណើតស្រុកសំរោងទង ខេត្តកំពង់ស្ពឺ បច្ចុប្បន្នស្នាក់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ឲ្យចូលបំភ្លឺពាក់ព័ន្ធករណីប្រទូសកេរខ្មាស ប្រព្រឹត្តនៅចំណុចភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី២១ ខែសីហា ឆ្នាំ២០១៦។ នៅថ្ងៃដដែលនេះ ជនសង្ស័យក៏ត្រូវនគរបាលខេត្តកំពង់ចាម ឃាត់ខ្លួនបញ្ជូនមកខេត្តបន្ទាយមានជ័យ ដើម្បីចាត់ការតាមច្បាប់៕