បង់ក្លាដែសៈ ក្រុមជនជាតិមូស្លីមរ៉ូហ៊ីងយ៉ា បានសម្រេចចិត្តឆ្លងដែនខុសច្បាប់ ទៅប្រទេសបង់ក្លាដែស
បន្ទាប់ពីមានអំពើហិង្សាថ្មីមួយ បានផ្ទុះឡើងប្រឆាំងនឹងពួកគេនៅក្នុងប្រទេសមីយ៉ាន់ម៉ា។ នេះបើយោងតាមសារព័ត៌មាន CNN ចេញផ្សាយនៅថ្ងៃទី១២ ខែធ្នូ ឆ្នាំ២០១៦។
ប្រទេសបង់ក្លាដែស កំពុងប្រកាន់ជំហរលើការសម្រេចចិត្ត ក្នុងការរារាំងក្រុមជនភៀសខ្លួនមូស្លីមរ៉ូហ៊ីងយ៉ា មិនឲ្យចូលប្រទេសរបស់ខ្លួនទ្បើយ។ លោក Mark Farmaner ប្រធានអង្គការ Burma Campaign UK និយាយថា ប្រទេសបង់ក្លាដែស កំពុងធ្វើការកាត់ទោសប្រហារជីវិត ទៅលើជនជាតិរ៉ូហ៊ីងយ៉ា ដោយសារតែការបដិសេធមិនឲ្យពួកគេចូលក្នុងប្រទេសនេះ។
ភាពតានតឹងចុងក្រោយ បានផ្ទុះឡើងនៅខេត្ត Kahkine ជាកន្លែងដែលក្រុមជនជាតិរ៉ូហ៊ីងយ៉ាភាគច្រើនរស់នៅ ខណៈដែលតំបន់នេះ បានរងការវាយប្រហារដោយក្រុមប្រដាប់អាវុធ នៅប៉ុស្តិ៍ការពារព្រំដែន ហើយបានសម្លាប់ប៉ូលិស៩នាក់ កាលពីថ្ងៃទី៩ ខែតុលា។
ពាក់ព័ន្ធនឹងវាយប្រហារនេះដែរ កងទ័ពមីយ៉ាន់ម៉ាបានចោទថា ជាសកម្មភាពរបស់សកម្មប្រយុទ្ធរ៉ូហ៊ីងយ៉ាថា ដែលធ្វើឲ្យកងទ័ពមីយ៉ាន់ម៉ា បានបិទភូមិដ្ឋានជាច្រើនរបស់ជនជាតិរ៉ូហ៊ីងយ៉ា។ ចាប់តាំងពីពេលនោះមក ប្រទេសមីយ៉ាន់ម៉ា ត្រូវបានគេចោទប្រកាន់ពីការរំលោភបំពានសិទ្ធិមនុស្សប្រឆាំងទៅលើក្រុមជនជាតិរ៉ូហ៊ីងយ៉ា បូករួមទាំងការសម្លាប់ក្រៅប្រព័ន្ធតុលាការ ការរំលោភសេពសន្ថវៈ និងការដុតបំផ្លាញផ្ទះសម្បែងផង។
ក្នុងការបង្ក្រាបទាំងនោះ កងទ័ពមីយ៉ាន់ម៉ា បានវាយប្រហារដោយប្រើឧទ្ធម្ភាគចក្រ ដែលទង្វើនេះ ត្រូវបានគេរាយការណ៍ថា បានបណ្តាលឲ្យសម្លាប់ជីវិតជនជាតិរ៉ូហ៊ីងយ៉ាប្រមាណ៣០០នាក់ និងរាប់ពាន់គ្រួសារទៀតគ្មានទីជំរក។
លោក Phil Robertson អនុប្រធានអង្គការឃ្លាំមើលសិទ្ធិមនុស្ស Human Rights Watch ប្រចាំតំបន់អាស៊ី និយាយថា ជនអំបូររ៉ូហ៊ីងយ៉ាដែលបាត់បង់ទីជម្រក កំពុងប្រឈមមុខនឹងការខ្វះខាតជំនួយស្បៀងអាហារយ៉ាងធ្ងន់ធ្ងរ ហើយជំនួយផ្សេងៗទៀត ត្រូវបានរាំងខ្ទប់ដោយអាជ្ញាធរនៅក្នុងប្រទេសមីយ៉ាន់ម៉ា៕
មតិយោបល់