វៀតណាម: នៅព្រឹកថ្ងៃអង្គារនេះ មានករណីរអិលបាក់ដីមួយ បានកើតឡើងនៅភាគកណ្តាលទីក្រុងញ៉ាត្រាង ប្រទេសវៀតណាម បានបណ្ដាលមនុស្ស ០២នាក់ស្លាប់ និងប្រហែល ១០ នាក់ទៀតរងរបួស ព្រមទាំងផ្ទះ ១០ ខ្នង ត្រូវបានកប់ចូលក្នុងដី។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី២០ ខែធ្នូ ឆ្នាំ២០១៦។

លោក Ngo Khac Thinh អនុប្រធានការិយាល័យគ្រប់គ្រងទីក្រុង បានឲ្យដឹងថា ខណ:នេះក្រុមជួយសង្គ្រោះ កំពុងរុករកជនរងគ្រោះ និងបញ្ជូនអ្នករងរបួស ក្នុងហេតុការណ៍នេះ ទៅកាន់មន្ទីរពេទ្យ ដើម្បីសង្គ្រោះបន្ទាន់។

លោក Nguyen Duc Quynh ប្រធាននាយកដ្ឋានពន្លត់អគ្គិភ័យខេត្ត Khanh Hoa បាននិយាយថា មនុស្សចាស់ម្នាក់ និងក្មេងប្រុស អាយុ ០៤ឆ្នាំម្នាក់ ត្រូវបានរកឃើញថាស្លាប់ បន្ទាប់ពីត្រូវបានយកចេញពីគំនរបាក់បែក ដោយកងកម្លាំងសង្គ្រោះ។

ហេតុការណ៍នេះ បានកើតឡើងនៅម៉ោងប្រមាណ ៤ ទៀបភ្លឺ (ម៉ោងក្នុងស្រុក) នៅពេលដែលជនរងគ្រោះ កំពុងដេកលក់៕