ម៉ាឡេស៊ីៈ នាយករដ្ឋមន្ត្រីម៉ាឡេស៊ីលោក Najib Razak បានអំពាវនាវដល់ប្រទេសមីយ៉ាន់ម៉ា នៅថ្ងៃព្រហស្បតិ៍នេះ ដើម្បីបញ្ឈប់ការរើសអើង និងការវាយប្រហារលើជនមូស្លីមរ៉ូហ៊ីងយ៉ា នៅក្នុងប្រទេស ដោយលោក បានជម្រុញឲ្យបណ្តាប្រទេសអ៊ីស្លាម នៅលើពិភពលោករួមគ្នា ក្នុងការបញ្ចប់សោកនាដកម្ម ដែលគ្មានមនុស្សធម៍​នេះ។ នេះបើយោងតាមរយៈសារព័ត៌មាន Channel News Asia ចេញផ្សាយនៅថ្ងៃទី១៩ ខែមករា ឆ្នាំ២០១៧។

រដ្ឋាភិបាលម៉ាឡេស៊ី បានចោទប្រកាន់ប្រទេសមីយ៉ាន់ម៉ាថា បានធ្វើបាបជនជាតិភាគតិចរ៉ូហ៊ីងយ៉ា ចាប់តាំងពីខែតុលា នៅពេលកងកម្លាំងសន្តិសុខ បានបើកការបង្រ្កាបបង្ហូរឈាមមួយ នៅភាគខាងជើងនៃរដ្ឋ Rakhineជិតព្រំដែនប្រទេសបង់ក្លាដែស។

បើតាមមន្រ្តី​អង្គការសហប្រជាជាតិ បានឲ្យដឹងថា​ យ៉ាងហោចណាស់មនុស្ស ៨៦ នាក់ ត្រូវបានសម្លាប់ និងប្រមាណជា ៦៦.០០០ នាក់ផ្សេងទៀត បានរត់គេចខ្លួនចូលក្នុងប្រទេសបង់ក្លាដែស ចាប់តាំងពីប៉ូលិសប្រាំបួននាក់ ត្រូវបានសម្លាប់ នៅក្នុងការវាយប្រហារ កាលពីខែតុលាឆ្នាំមុន ដែលរដ្ឋាភិបាលមីយ៉ាន់ម៉ា បានធ្វើការបន្ទោសមកលើពួកសកម្មប្រយុទ្ធ រ៉ូហ៊ីងយ៉ា៕