មនុស្សជាច្រើនម៉ឺននាក់បានចាប់ផ្ដើមប្រមូលផ្ដុំគ្នាជាជួរ នៅខាងក្រៅព្រលានយន្តហោះរដ្ឋ Florida កន្លែងដែលលោកប្រធានាធិបតី Donald Trump កំណត់ពេលជួបជុំអ្នកគាំទ្ររបស់លោកនៅល្ងាចថ្ងៃអាទិត្យនេះ។

នេះបើយោងតាមរយៈសារព័ត៌មាន BBC ចេញផ្សាយនៅថ្ងៃទី១៩ ខែកុម្ភៈ ឆ្នាំ២០១៧។

មនុស្សចំនួន ៣ម៉ឺននាក់ដែលត្រូវចូលរួមក្នុងព្រឹត្តិការណ៍ដែល គ្រោងនឹងធ្វើនៅព្រលានយន្តហោះ Melbourne ដែលស្ថិតនៅតាមបណ្ដោយឆ្នេរសមុទ្រអាត្លង់ទិច រដ្ឋ Florida។ លោក Trump ត្រូវគេរំពឹងថា នឹងមកដល់ព្រលានយន្តហោះនេះ តាមរយៈការធ្វើដំណើរតាមជើងយន្តហោះពិសេសរបស់ប្រធានាធិបតី Air Force One នៅម៉ោងប្រហែល ៥ល្ងាច ហើយការជួបជុំគ្នានេះនឹងចាប់ផ្ដើមក្រោយពេលលោក Trump អញ្ជើញមកដល់តែម្ដង។

អ្នកនាំពាក្យសេតវិមានអ្នកស្រី Sarah Sanders បានប្រាប់ទីភ្នាក់ងារសារព័ត៌មាន Reuters កាលពីថ្ងៃព្រហស្បតិ៍ ហេតុផលមួយផ្នែកដែល លោក Trump បង្កើតព្រឹត្តិការណ៍នេះឡើង ពីព្រោះលោកមិនគិតថា សាររបស់លោកតែងតែត្រូវបាន សារព័ត៌មានយកទៅចុះផ្សាយដោយយុត្តិធម៌នោះទេ ហើយលោក Trump អាចបញ្ចេញសាររបស់លោកដោយខ្លួនឯង ប្រកបដោយប្រសិទ្ធភាព តាមរយៈការឈរលើវេទិកា និយាយទៅកាន់ពលរដ្ឋអាមេរិក។

ការជួបជុំជាមួយអ្នកគាំទ្រដែលលោក Trump បាននឹងគ្រោងធ្វើឡើងនៅថ្ងៃសៅរ៍នេះ មិនមានអ្វីប្លែកពីជំនាន់ប្រធានាធិបតីពីមុនៗឡើយ ហើយលោកអតីតប្រធានាធិបតី Barack Obama ក៏បានរៀបចំព្រឹត្តិការណ៍នានាស្រដៀងគ្នានេះដែរ នៅពេលដែលលោកកាន់ដំណែងជាប្រធានាធិបតី ដើម្បីកសាងការគាំទ្រទៅលើកញ្ចប់ថវិកាជំរុញសេដ្ឋកិច្ចរបស់លោកក្នុងតំណែងជាប្រធានាធិបតីអាមេរិក៕