ម៉ាទ្បេស៊ីៈ បន្ទាប់ពីមានការហាមឃាត់ មិនឲ្យធ្វើដំណើរចាកចេញពីប្រទេស ដោយរដ្ឋាភិបាលក្រុងព្យុងយ៉ាងនោះ បុគ្គលិកអង្គការសហប្រជាជាតិ ០២ នាក់ ក្នុងចំណោមជនជាតិម៉ាឡេស៊ីចំនួន ១១ នាក់ ដែលបានជាប់ឃាំង នៅកូរ៉េខាងជើង ឥទ្បូវនេះ ត្រូវបានចាកចេញពីប្រទេសនេះហើយ។ នេះបើយោងតាមរយៈ សារព័ត៌មាន Channel News Asia ចេញផ្សាយនៅថ្ងៃទី១០ ខែមីនា ឆ្នាំ២០១៧។

អ្នកទាំង០២ ជាបុគ្គលិកធ្វើការផ្នែកកម្មវិធីស្បៀងអាហារពិភពលោក ហៅកាត់ថា (WFP) ។

តាមការបញ្ជាក់ពីមន្ត្រី WFP បានឲ្យដឹងថា បុគ្គលិកអង្គការ WFP ជនជាតិម៉ាឡេស៊ី ០២ នាក់នេះ បានចាកចេញពីប្រទេសកូរ៉េខាងជើងហើយ នឹងមកដល់ទីក្រុងប៉េកាំងនៅថ្ងៃនេះ។

សូមជំរាបថា អ្នកទាំង ០២ មិនមែនជាអ្នកតំណាងឲ្យរដ្ឋាភិបាលរបស់ពួកគេទ្បើយ ដោយគ្រាន់តែជាសមាជិកបុគ្គលិក មន្ត្រីរាជការស៊ីវិលអន្តរជាតិ ដែលបានធ្វើការ ក្នុងកម្មវិធីរបស់ WFP នៅកូរ៉េខាងជើងប៉ុណ្ណោះ៕