បារាំង: ប្រភពពីក្រសួងមហាផ្ទៃ បានឲ្យដឹងថា មនុស្ស ០៣ នាក់ បានរងរបួស ក្នុងការបាញ់ប្រហារមួយ នៅវិទ្យាល័យ Alexis de Tocqueville ស្ថិតក្នុងទីក្រុង Grasse ភាគខាងត្បូងប្រទេស។ និស្សិតម្នាក់ អាយុ ១៧ ឆ្នាំ ដែលប្រដាប់ដោយកាំភ្លើង AK មួយដើម កាំភ្លើងដៃពីរដើម និងគ្រាប់បែកចំនួនពីរគ្រាប់ ត្រូវបានកម្លាំងប៉ូលិសក្នុងតំបន់កើតហេតុ ចាប់ខ្លួន​ជុំវិញឧប្បត្តិហេតុនេះ។ នេះបើយោងតាមរយ: សារព័ត៌មាន RT ចេញផ្សាយនៅថ្ងៃទី១៧ ខែមីនា ឆ្នាំ២០១៧

ក្មេងជំទង់រូបនេះ ជាអ្នកបើកការបាញ់ប្រហារជាមួយនឹងកាំភ្លើង AK ដែលបណ្ដាលឲ្យមនុស្ស ០៣នាក់រងរបួស ហើយបើតាមសេចក្ដីរាយការណ៍ បានឲ្យដឹងថា ចាងហ្វាងសាលា បានស្ថិតក្នុងចំណោមអ្នករងរបួសទាំងនោះផងដែរ។

អ្នកនាំពាក្យក្រសួង បាននិយាយថា មនុស្ស ០៥ នាក់ផ្សេងទៀត បានទទួលការតក់ស្លុតយ៉ាងខ្លាំង នៅក្នុងឧប្បត្តិហេតុនេះ។

គួរបញ្ជាក់ថា រដ្ឋាភិបាលបារាំង បានចេញសេចក្តីប្រកាស​ឲ្យមប្រុងប្រយ័ត្នខ្ពស់ បន្ទាប់ពីកើតមានការបាញ់ប្រហារ នៅក្នុងសាលារៀនខាងលើនេះ ខណ:ដែលប្រទេសនេះ កំពុងបន្តស្ថិតនៅក្នុង​ការប្រកាសអាសន្ននៅឡើយ ចាប់តាំងពីការវាយ​ប្រហារពីរលើក នៅទីក្រុងប៉ារីស កាលពីឆ្នាំ២០១៥ និងមួយទៀតនៅទីក្រុង Nice ឆ្នាំមុន៕