ព័ត៌មានអន្តរជាតិ

លោក Duterte បញ្ជាឲ្យពលទាហាន ដាក់ពង្រាយនៅតំបន់ថ្មប៉ប្រះទឹក ក្នុងសមុទ្រចិនខាងត្បូង

ហ្វីលីពីន: ប្រធានាធិបតីលោក Rodrigo Duterte នៅថ្ងៃព្រហស្បតិ៍នេះ បាននិយាយថា លោកបានបញ្ជាឲ្យពលទាហាន ដាក់ពង្រាយនៅលើកោះ និងថ្មប៉ប្រះទឹក ជាតំបន់គ្មានមនុស្សរស់នៅ ក្នុងសមុទ្រចិនខាងត្បូង ដែលទង្វើនេះ អាចជាការបញ្ឆេះកំហឹងដល់បណ្ដាប្រទេសកំពុងមានជម្លោះ នៅដែនទឹកនោះ ដោយរួមបញ្ចូលទាំងទីក្រុងប៉េកាំងផងដែរ។ នេះបើយោងតាមរយ: សារព័ត៌មាន Channel News Asia ចេញផ្សាយនៅថ្ងៃទី០៦ ខែមេសា ឆ្នាំ២០១៧។

ក្នុងអំឡុងពេលដំណើរទស្សនកិច្ចមួយ ទៅកាន់ជំរំយោធា ភាគខាងលិចកោះប៉ាឡាវ៉ាន នៅក្បែរក្រុមប្រជុំកោះ Spratly ជាដែនទឹកមានជម្លោះ លោក Duterte បាននិយាយថា « វាហាក់បីដូចជាអ្នករាល់គ្នា កំពុងដណ្ដើមយកសម្រាប់កោះនៅទីនោះ ហេតុដូច្នេះវានឹងល្អប្រសើរ បើសិនជាយើងទៅរស់នៅ តំបន់ទំនេរនោះ»។

ចិនបានអះអាងថា ស្ទើរតែរាល់ធនធានទាំងអស់ នៅដែនទឹកជម្លោះសមុទ្រចិនខាងត្បូង ជាអធិបតេយ្យភាពរបស់ខ្លួន បើទោះបីជាមានពាក្យបណ្តឹងទាមទារមកពីបណ្ដាប្រទេសជិតខាង ក្នុងតំបន់អាស៊ីអាគ្នេយ៍យ៉ាងណាក៏ដោយ លើសពីនេះទៅទៀត ក្រុងប៉េងកាំងថែមទាំងបានកសាងកោះសិប្បនិម្មិត នៅតំបន់ថ្មប៉ប្រក់ទឹក ដើម្បីពង្រឹងអំណាចយោធា ជាមធ្យោបាយធ្វើពាណិជ្ជកម្មនៅទូទាំងផ្លូវទឹករបស់ខ្លួនទៀតផង។

លោក Duterte ធ្លាប់បាននិយាយថា លោកនឹងបើកចំហ សម្រាប់ការចែករំលែកធនធានទឹក ជាមួយរដ្ឋាភិបាលទីក្រុងប៉េកាំង នៅក្នុងដែនទឹកសមុទ្រចិនខាងត្បូង ជាចំណុចមួយ ដែលតុលាការអន្តរជាតិ បានផ្តល់សិទ្ធិផ្តាច់មុខដល់រដ្ឋាភិបាលក្រុងម៉ានីល។

ផ្ទុយទៅវិញនៅពេលនេះ លោកប្រធានាធិបតី បែរជាបង្ហាញឥរិយាបទផ្លាស់ប្តូរទៅវិញ ជាមួយនឹងការប្រកាសរបស់លោកនៅថ្ងៃព្រហស្បតិ៍នេះថា «វាជាពេលវេលាដើម្បីយើងបង្កើតរចនាសម្ព័ន្ធ និងលើកទង់ជាតិហ្វីលីពីននៅទីនោះ»៕

មតិយោបល់